SHBA: Gazsjellësi ‘Nord Stream 2’ nuk do të hapet nëse Rusia pushton Ukrainën

Gazsjellësi “Nord Stream 2” midis Rusisë dhe Gjermanisë nuk do të ecë përpara, nëse Rusia pushton Ukrainën.

Është kjo deklarata e Departamentit të Shtetit të SHBA-ve, si përforcim i pozicionit të mëparshëm të Perëndimit për furnizimin me gaz strategjikisht jetik.

Ndërsa tensionet u rritën rreth ngritjes ushtarake të Rusisë në kufirin lindor të fqinjit të saj, zëdhënësi i Departamentit të Shtetit, Ned Price, mbrëmjen e të mërkurës tha se administrata e Biden-it “po punonte me Gjermaninë” për të siguruar që ajo mund të përballonte humbjen e tubacionit.

“Dua të jem shumë i qartë, nëse Rusia pushton Ukrainën në një mënyrë ose në një tjetër, ‘Nord Stream 2’ nuk do të ecë përpara”, tha Price për Radion Kombëtare Publike.

“Nuk do të hyj në specifika. Ne do të punojmë me Gjermaninë për të siguruar që ajo të mos ecë përpara”.

Ministrja e Jashtme e Gjermanisë, Annalena Baerbock, e cila ka argumentuar më parë në favor të vendosjes së sanksioneve energjetike në përgjigje të agresionit nga Moska, tha se e ardhmja e “Nord Stream 2” mund të diskutohet si pjesë e një “game të gjerë” të përgjigjeve të mundshme ndaj agresionit rus.

“Në rastin e një akti të ri agresioni, ne kemi në dispozicion një brez të gjerë përgjigjesh, duke përfshirë ‘Nord Stream 2’” tha ajo në Bundestag të enjten.

Ajo theksoi se, ndërsa do të preferonte të “vazhdonte dialogun” me Rusinë – sepse “nëse po flisni, nuk po qëlloni”, por jo me çdo çmim. “Ne duhet ta bëjmë plotësisht të qartë se agresioni i ri ushtarak kundër Ukrainës do të kishte pasoja masive për Rusinë”, tha ajo.

Emily Haber, ambasadorja e Gjermanisë në Washington, duket se ka miratuar një forcim të pozicionit në komentet e së enjtes.

Komentet erdhën pas një dite aktiviteti intensiv diplomatik, me SHBA-të që thanë se kishin vendosur një rrugë për të adresuar kërkesat ruse në Evropën Lindore, ndërsa Moska zhvilloi bisedime për sigurinë me vendet perëndimore dhe vazhdoi ngritjen e saj ushtarake.

Në një përgjigje me shkrim të dorëzuar personalisht nga ambasadori i saj në Moskë, SHBA-të përsëritën angazhimin e tyre për të mbështetur politikën e NATO-s “të dyerve të hapura” duke ofruar një “vlerësim parimor dhe pragmatik” të shqetësimeve të Kremlinit, tha sekretari amerikan i shtetit, Antony Blinken.

Rusia i ka kërkuar NATO-s të tërheqë trupat dhe armët nga Evropa Lindore dhe të ndalojë fqinjin e saj Ukrainën, një ish-shtet sovjetik, që të mos bashkohet ndonjëherë.

Washington-i dhe aleatët e tij të NATO-s, si Britania e Madhe dhe Franca, e refuzojnë këtë qëndrim, por thonë se janë të gatshëm të diskutojnë tema të tjera, si kontrolli i armëve dhe masat e ndërtimit të besimit.

Sekretari i Përgjithshëm i NATO-s, Jens Stoltenberg, tha se, “ndërsa ne shpresojmë dhe punojmë për një zgjidhje të mirë – de-përshkallëzimi – jemi gjithashtu të përgatitur për më të keqen”.

Ministri i Jashtëm i Kinës, Wang Yi, tha të enjten se të gjitha palët e përfshira në çështjen e Ukrainës duhet të qëndrojnë të qetë dhe të përmbahen nga veprimet që nxisin tensionin dhe nxitin krizën, ndërsa zhvilloi bisedime me Blinken-in.

Projekti energjetik më përçarës i Evropës, “Nord Stream 2” është projektuar për të dyfishuar sasinë e gazit që rrjedh nga Rusia drejt Gjermanisë, duke anashkaluar rrugën tradicionale të transitit përmes Ukrainës nëpërmjet një tubacioni përgjatë shtratit të Detit Baltik.

Ajo është përballur me rezistencë brenda BE-së, nga SHBA-të, si dhe Ukraina, me arsyetimin se rrit varësinë energjetike të Evropës nga Rusia dhe mohon tarifat e transitit të Ukrainës, në një kohë të një përplasjeje më të gjerë të Moskës me Perëndimin.

Tubacioni prej 11 miliardë dollarësh (8.3 miliardë paund) u njoftua për herë të parë në vitin 2015.

Angela Merkel, e cila dha dorëheqjen si kancelare gjermane në vitin 2021, ishte një mbështetëse entuziaste,pasi premtoi të furnizonte me karburant të lirë 26 milionë shtëpi gjermane.

Por ajo pranoi në vitin 2018 se nuk mund të shihej si një “projekt i vetëm ekonomik”, por ishte gjithashtu një projekt politik që kërcënonte integritetin e Ukrainës, duke e anashkaluar atë si një vend transit.

Frika e kahershme se kjo mund t’i japë Vladimir Putin-it më shumë ndikim mbi Gjermaninë dhe vendet e tjera evropiane janë përforcuar ndjeshëm nga bllokimi i Ukrainës.

Ndërtimi i tubacionit përfundoi në shtator, por pronari i tij, kompania ruse e gazit “Gazprom”, po pret lejen përfundimtare ligjore nga rregullatorët gjermanë për të hapur valvulat dhe për të dërguar gazin drejt Perëndimit.

Agjencia Federale e Rrjetit është akuzuar se ka zvarritur procesin e certifikimit, megjithëse ka disa që besojnë se kjo është një taktikë e qëllimshme dhe ka fituar mbështetje nga disa zyrtarë amerikanë.

Perspektiva e ndërprerjes së furnizimeve nga Rusia në rast konflikti ka bërë që administrata e Biden të fillojë bisedimet me vendet prodhuese të gazit në të gjithë botën për të siguruar furnizime për Evropën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.