Rama përgëzon Kurtin për pranimin e planit të ri të BE-së për Kosovën dhe Serbinë

Kryeministri shqiptar, Edi Rama, e ka përgëzuar publikisht homologun e tij kosovar, Albin Kurti, lidhur me pranimin e një plan-propozimi të ri evropian, sa i takon dialogut mes Kosovës dhe Serbisë.

Përmes një publikimi në median sociale X, njohur më parë si Twitter, Rama shkruan se zgjidhja debllokuese e Asociacionit të Komunave me shumicë serbe përmes instrumenteve të vetë-menaxhimit si kornizë për negociatat e ardhshme.

“Ky është me të vërtetë një moment historik i rëndësishëm”, shkruan kryeministri. “Liderët e Kosovës dhe Serbisë duhet të demonstrojnë lidership dhe të punojnë ngushtë me partnerët tanë perëndimorë për zbatimin e menjëhershëm të Marrëveshjes Themelore për normalizimin e marrëdhënieve, pa vonesa të mëtejshme”.

Përgëzoj Kryeministrin e Kosovës për pranimin e propozimit të BE-së për të përparuar me vendosmëri drejt një zgjidhjeje zhbllokuese lidhur me AKSHS, përmes instrumenteve të vetëmenaxhimit si një kuadër për negociatat vijuese. Kjo është një pikë vërtetë kyçe. Udhëheqësit e Kosovës…

— Edi Rama (@ediramaal) October 26, 2023

Më tej, ai shkruan edhe për rajonin, ku nuk ngurron të thotë se Ballkani Perëndimor meriton paqen, stabilitetin dhe bashkëpunimin për një të ardhme të përbashkët, më të mirë, në vend të konflikteve, lojërave të fajësimit dhe pengesave që na dëmtojnë të gjithëve.

“20 minuta secili” – Kurti e Vuçiç përfundojnë takimet me Macron, Scholz e Meloni

Ashtu siç edhe ishte paralajmëruar kryeministri i Kosovës, Albin Kurti, e presidenti i Serbisë, Aleksnadër Vuçiç, në Bruksel kanë takuar ndarazi, udhëheqësit evropianë, në margjinat e samitit të krerëve të 27 vendeve anëtare të BE-së të enjten në kryeqendrën evropiane në Bruksel.

I pari i cili takoi kancelarin gjerman, Olaf Scholz, presidenti francez, Emmanuel Macron, dhe kryeministren italiane, Giorgia Meloni, ishte kryeministri Kurti.

Takimi zgjati rreth 20 minuta.

Pas largimit të Kurtit, në sallën brenda hotelit ku u mbajt takimi, hyri presidenti Vuçiç.

Vuçiç, njëjtë si Kurti, takoi Scholz, Macron e Meloni.

Edhe takimi mes tyre zgjati rreth 20 minuta.

As Kurti e as Vuçiç nuk u deklaruan për media.

Në takimet të pranishëm ishin edhe shefi i politikës së jashtme të BE-së, Josep Borrell, si dhe presidenti i Këshillit Evropian, Charles Michel.

Ndërkohë, pak para takimit, i deleguari i BE-së për dialogun, Miroslav Lajçak deklaroi se ka pritshmëri të mëdha nga këto takime bilaterale.

Në anën tjetër zëdhënësi i BE-së, Peter Stano, tha se takimet janë vazhdimësi e procesit që filloi fundjavën e kaluar, kur “Pesëshja e Madhe” e të dërguarve perëndimorë vizitoi Prishtinën dhe Beogradin.

“Ideja është që këto takime të zhvillohen në margjinat e samitit të BE-së, në mbështetje të kthimit në dialog. Mesazhi i BE-së është se presim që të dyja palët, Serbia dhe Kosova, t’iu kthehen menjëherë dhe pa pengesa detyrimeve që dalin nga dialogu, të punohet menjëherë për uljen e tensioneve dhe rifillimin e dialogut”, deklaroi Stano.

Takimet bilaterale në Bruksel vijnë pas vizitës së “Pesëshes së madhe” në Prishtinë e Beograd, me 21 tetor ku u paraqit një plan për normalizimin e marrëdhënieve.

Stano konfirmoi se plani përmban një “propozim modern evropian” për statutin e Asociacionit të komunave me shumicë serbe në Kosovë.

Ndryshe burimet e Albanian Post brenda procesit negociator, tregojnë që me konfirmimin publik për ta pranuar propozimin evropian për statutin e Asociacionit, si një bazë e mirë për negociata të mëtejme, Qeveria e Kosovës ka bërë hapin e parë drejt zbatimit të hapave të paraparë në planin e BE-së për zbatimin e sekuencuar të marrëveshjes së Ohrit.

Sekuenca e parë fillon me veprimin e Kosovës: “fillimi i procesit të negociatave për Statutin e instrumentit të vetë administrimit për serbët e Kosovës”.

Ky veprim i palës kosovare duhet të ketë përgjigjen me veprimin konkret të Serbisë, konkretisht, “Serbia nuk insiston më në përdorimin e yllit dhe fusnotës ose pjesëmarrjen e UNMIK-ut në forumet rajonale”.

Sipas burimeve të AP, ndërmjetësuesit synojnë që të përmbyllin negociatat për Statutin para samitit të fund vitit të liderëve të shteteve të BE-së (sekuenca e dytë).

Të njëjtat burime thonë se në fund të këtij procesi Kosova do të marr përsipër autorësinë e draft-statutit përfundimtar.

Në ndërkohë, siç shpjegojnë burimet e AP, po punohet intenzivisht që në samitin e paqes në Paris, me 10 dhe 11 Nëntor, të ketë një takim në mes të Kurtit dhe Vuçiç, në prani të liderëve kryesorë evropianë.

“Nëse ndodh, fakti që ndodh në samitin francez të paqes, ky takim do ta ketë një rëndësi të madhe simbolike që shënon rikthimin e palëve në rrugën e paqes”, thotë burimi i AP-së.

Gjithashtu, këto burime ndërkombëtare shpjegojnë që themelimi faktik i Asociacionit mund të vonojë për disa muaj për shkak të nevojës që fillimisht të organizohen zgjedhje të reja në komunat veriore.

Pra, duhet të ketë një qetësim të përgjithshëm të situatës, vendosje të kryetarëve që gëzojnë mbështetjen e popullsisë vendase, dhe më pas ta vazhdohet me themelimin faktik të Asociacionit, si hap i rëndësishëm në procesin e re-integrimit të komunitetit serb në rendin juridik dhe politik të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.