Hasani nga Estonia: Shqipëria, qëndrim të palëkundur në mbrojtje të Ukrainës

Pas Strasburgut, Ministri për Evropën dhe Punët e Jashtme, Igli Hasani udhëtoi drejt Estoni, për të marrë pjesë në konferencën ndërkombëtare “Lennart Meri” që u mbajt në kryeqytetin e Estonisë, Talin.

Në panelin ku morën pjesë kryeministrja e Estonisë, Kaja Kallas dhe Ministri i Punëve të Jashtme të Ukrainës, Dmytro Kuleba (online), Ministri Hasani theksoi se, agresioni rus në Ukrainë vijon të mbetet kërcënimi më kritik për paqen dhe sigurinë në kontinentin evropian dhe më gjerë.

Ai theksoi se Shqipëria vazhdon të mbajë një qëndrim të qartë dhe të palëkundur në mbrojtje të integritetit territorial, sovranitetit dhe pavarësisë së Ukrainës, në përputhje me qëndrimin e BE-së, NATO-s dhe SHBA-së.

“Shqipëria mbështet në mënyrë aktive përpjekjet dhe iniciativat e ndërmarra për të siguruar përgjegjësi të plotë për krimet më të rënda sipas ligjit ndërkombëtar të kryera në Ukrainë. Duke i qëndruar krah Ukrainës, Shqipëria po e mbështet atë politikisht, ekonomikisht dhe ushtarakisht, deri në arritjen e një paqeje të drejtë dhe të qëndrueshme”, tha kreu i diplomacisë.

I pyetur mbi rolin e Rusisë në sigurinë në botë, Hasani tha se fituesi i vetëm në këto kohë të trazuara është NATO, aleanca e vlerave dhe kombeve që duan paqen dhe respektojnë të drejtat e popujve.

Gjatë qëndrimit 24 orësh në Talin, Ministri Hasani u prit nga kryeministrja Kallas, homologu estonez Margus Tsahkna dhe drejtues të Komitetit për Politikën e Jashtme në parlamentin e Estonisë, ku shprehu mirënjohjem për mbështetjen e vazhdueshme të Estonisë për procesin e integrimit të Shqipërisë dhe Ballkanit Perëndimor në BE.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.