Vazhdon seanca gjyqësore ndaj Januzit, Bahtijarit dhe Shalës

Të martën, do të vazhdojë seanca gjyqësore ndaj Sabit Januzit, Ismet Bahtijari dhe Haxhi Shalës, mbi ecurinë e çështjes gjyqësore.

Lajmin e kishte bërë të ditur DhSK-ja përmes një njoftimi për media.

“Siç është njoftuar në kalendarin e gjykatës, konferenca mbi ecurinë e çështjes në çështjen e përbashkët kundër Sabit Januzit, Ismet Bahtjarit dhe Haxhi Shalës është planifikuar për të martën, 13 shkurt”, thuhet në njoftimin e DhSK-së.

Më 12 janar, Prokuroria e Specializuar ka dorëzuar aktakuzën e përbashkët në rastin ndaj Sabit Januzit, Ismet Bahtijarit dhe Haxhi Shalës.

Lajmin e kishte bërë të ditur Zyra e Prokurorit Special, të premten.

“Sipas urdhrit gojor të gjyqtarit të procedurës paraprake Guillou më 14 dhjetor 2023, ZPS sot ka dorëzuar aktakuzë të përbashkët për rastet e Januzi&Bahtijarit dhe Haxhi Shalës”.

“Aktakuza e përbashkët është konfidenciale”, thuhet në komunikatë.

Më 13 dhjetor, ZPS-ja pati paraqitur kërkesë për bashkimin e çështjeve gjyqësore në një gjykim të vetëm.

Gjyqtari i procedurës paraprake pati urdhëruar Prokurorinë që ta dorëzonte aktakuzën deri më 12 janar.

Deri më tash Shala në njërën anë dhe Januzi e Bahtijari në anë tjetër, ishin në procese të ndara gjyqësore.

Ata akuzohen për pengim të administrimit të drejtësisë.

Zyra e Prokurorit të Specializuar e akuzon Shalën se ndërmjet 5 prillit dhe 12 prillit 2023 ka ndërmarrë veprime të ndryshme, shpesh në bashkëkryerje me të akuzuarit Sabit Januzi dhe Ismet Bahtjari, “ku përmes frikësimit apo ofrimit të shpërblimit e kanë nxitur dëshmitarin 1 të tërhiqet nga dëshmia apo të gënjejë gjatë dëshmisë së tij në Speciale”.

Aktakuza e ZPS-së kundër Sabit Januzit e Ismet Bahtjarit dhe ajo kundër Haxhi Shalës janë thuajse të ngjashme.

Ata akuzohen për vepra penale në periudhën e njëjtë, duke u thirrur në nenet e njëjta të Kodit Penal të Kosovës dhe në masë të madhe për vepra penale të kryera si grup.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.