Publikohet dokumenti i armëpushimit që Hamasi e pranoi, por Izraeli e refuzoi – 3 faza në 3 muaj

Është publikuar dokumenti, i ndërmjetësuar nga Egjipti dhe Katari, të cilin Hamasi e pranoi për një armëpushim me Izraelin, por shteti hebre e refuzoi si i papajtueshëm me atë çfarë ishte rënë më parë dakord.

Ishte fillimisht pala e Hamasit, ajo e cila bëri me dije se kishte rënë dakord për armëpuhsim.

Menjëherë më pas, Izraeli e quajti të gjithën një “marifet” për të ndaluar operacionin në Rafah, i cili nisi menjëherë pas refuzimit izraelit për të shkuar në armëpushim.

Por, çfarë thotë dokumenti, i cili është i ndarë në tre faza dhe në sa kohë shtrihej propozimi?

Shtetet e Bashkuara, të cilat së bashku me Katarin dhe Egjiptin kanë luajtur një rol ndërmjetësues në bisedime, thanë se po studionin përgjigjen e Hamasit dhe do ta diskutonin atë me aleatët e Lindjes së Mesme.

Bazuar në detajet e shpallura deri më tani nga zyrtarët e Hamasit dhe një zyrtar i informuar mbi bisedimet, marrëveshja që grupi palestinez tha se kishte rënë dakord të përfshinte sa vijon:

FAZA E PARË

– Periudha 42-ditore e armëpushimit

– Hamasi liron 33 pengje izraelite në këmbim të Izraelit që liron palestinezët nga burgjet izraelite.

– Izraeli tërheq pjesërisht trupat nga Gaza dhe lejon lëvizjen e lirë të palestinezëve nga jugu në veri të Gazës.

FAZA E DYTË

– Një periudhë tjetër 42-ditore që përmban një marrëveshje për të rivendosur një “qetësi të qëndrueshme” në Gaza, gjuhë që një zyrtar i informuar për bisedimet tha se Hamasi dhe Izraeli kishin rënë dakord për të hequr diskutimin e një “armëpushimi të përhershëm” nga tavolina.

– Tërheqja e plotë e shumicës së trupave izraelite nga Gaza.

– Hamasi liron rezervistët izraelitë dhe disa ushtarë në këmbim të Izraelit që liron palestinezët nga burgu.

FAZA E TRETË

– Përfundimi i shkëmbimit të organeve dhe fillimi i zbatimit të rindërtimit sipas planit të mbikëqyrur nga Katari, Egjipti dhe Kombet e Bashkuara.

– Përfundimi i bllokadës së plotë në Rripin e Gazës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.