Osmani takon të dielën Nënsekretaren Allen, nënshkruajnë marrëveshje kundër manipulimit të informacionit

Presidentja e Kosovës, Vjosa Osmani, do ta presë të dielën në takim Nënsekretaren Amerikane të Shtetit, Elizabeth Allen, me të cilën do të nënshkruhet edhe një marrëveshje.

Lajmi është bërë i ditur nga Zyra e Presidencës, të cilët kanë njoftuar se do të nënshkruhet marrëveshje mirëkuptimi ndërmjet Qeverisë së Shteteve të Bashkuara të Amerikës dhe Kosovës, kundër manipulimit të informacionit nga shtetet e huaja.

“Në orën 09:00, Presidentja e Republikës së Kosovës, Vjosa Osmani pret në takim Nënsekretaren e SHBA-ve për Diplomacinë Publike, Elizabeth Allen. Mediat do të marrin pamje në fillim të takimit, ndërkaq më pas edhe në nënshkrimin e marrëveshjes së mirëkuptimit ndërmjet Qeverisë së Shteteve të Bashkuara të Amerikës dhe Republikës së Kosovës, kundër manipulimit të informacionit nga shtetet e huaja”, thuhet në njoftim.

Pas nënshkrimit të marrëveshjes, Presidentja Osmani dhe Nënsekretarja Allen do të deklarohen për media.

Pos Osmanit, në Prishtinë Allen do ta takojë edhe kryeministrin Albin Kurti.

Kjo vizitë e saj në Kosovë është në kuadër të një turi ballkanik që Allen është duke e bërë këtë javë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.