Operacioni i SPAK: Arrestohet Naim Stafuka, vëllai i Enver Stafukës i rrëmbyer dhe zhdukur në 2015

Mes urdhër-arresteve të firmosura nga Gjykata e Posaçme me kërkesë të Prokurorisë së Posaçme SPAK është dhe emri i Naim Stafukës, vëllai i Enver Stafukës, i cili u rrëmbye dhe u zhduk në shkurt të 2015 në Fushë-Krujë.

Në janar të vitit 2022 banesës së tij në Fushë Krujë iu vu tritol.

Lënda plasëse u vendos në derën e shkalleve të një objekti tre katesh ku ka disa biznese por në katin e tretë banon Naim Stafuka me familjen.

Shpërthimi ndodhi pikërisht në vendin ku vite më parë u rrëmbye nga persona të maskuar i vëllai, Enveri.

Një megaoperacion i zbatuar nga Policia e Shtetit me urdhër të Prokurorisë së Posaçme SPAK ka marrë vend të premten e 17 majit, që prej orëve të para të mëngjesit, si një goditje ndaj krimit të organizuar në gjithë vendin.

Siç ka raportuar më parë Albanian Post, janë rreth 50 urdhër-arreste të lëshuara nga SPAK, për persona të dyshuar të përfshirë në veprimtari dhe grupe kriminale.

Aksioni po zhvillohet në disa rajone, duke përfshirë Lezhën, Vlorën, Niklën dhe Durrësin.

Mes të përfshirëve, mendohet se janë edhe anëtarë të familjes Avdylaj. Ndërsa, kontrolle janë bërë edhe në banesën e Durim Bamit dhe Valter Bamit, emra të njohur për drejtësinë.

Disa kontrolle mësohet se janë zhvilluar edhe në Vlorë, në banesën e Fatmir Hysenit.

Nga ana tjetër, ish-deputeti socialist, Arben Ndoka, është shpallur në kërkim.

Vetë Ndoka ndërkaq, ka pasur çështje të hapura me drejtësinë edhe më herët, pasi Prokuroria e Krimeve të Rënda ka sekuestruar pasurinë e tij, në tetor të vitit 2018, në kuadër të operacionit “Volvo 4”, si i përfshirë në një skemë tjetërsimi pronash.

Në pranga mësohet se ka rënë edhe biznesmeni nga Shkodra, Mir Brruli, i cili është i dyshuar për veprimtari kriminale.

Ai është një i afërm i një tjetër të arrestuari më parë, biznesmenit Pëllumb Gjoka.

Pak kohë më parë një prej bizneseve të Mir Brulit në pjesën e Vilunit në plazhin e Velipojës u shemb nga IKMT si ndërtim pa leje. Mir Bruli është i njohur për bizneset në plazhin e Velipojës, lokale, restorante dhe hoteleri ndërsa është i dyshuar nga SPAK si i përfshirë në veprimtari të ndryshme kriminale.

Po ashtu, ndër emrat e lakuar për t’u arrestuar është edhe ai i Elvis Doçit, i njohur me nofkën Visi i Pojës.

Durrsaku është një emër i njohur për drejtësinë, i cili mendohet se është i përfshirë në disa ngjarje kriminale, përfshi vrasjeve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.