Hamasi tregon se është gati për marrëveshje, izraelitët ende të përçarë

Negociatat për një marrëveshje të mundshme pengjesh dhe armëpushimi në Gaza u panë – të shtunën e 4 majit – si të arritshme, me Hamasin të vendosur të ofrojë përgjigjen e tij ndaj propozimit të fundit.

Me ndërmjetësuesit arabë dhe amerikanë që bëjnë presion intensiv për një armëpushim të përkohshëm, disa raporte në media izraelite dhe jo vetëm thanë se Hamasi ishte i përgatitur të pranonte propozimin.

Kjo në dritën e garancive nga Shtetet e Bashkuara se do të ketë një “ndërprerje të qëndrueshme” të luftës.

Nuk ishte e qartë nëse një përgjigje e tillë do të ishte një miratim i drejtpërdrejtë i propozimit të ofruar, apo një që vjen me paralajmërime të ndryshme.

Një delegacion i Hamasit ishte në Kajro të shtunën, ashtu si edhe drejtori i CIA-s, William Burns, për takime me ndërmjetësit egjiptianë.

Marrëveshja e armëpushimit besohet të përbëhet nga disa faza të mundshme, me fazën e parë që parashikon një lirim të kufizuar të pengjeve “humanitarë” për një armëpushim prej disa javësh.

Duke cituar burime të paidentifikuara , gazeta palestineze “Al-Quds” tha se ndërmjetësit amerikanë kishin premtuar se Izraeli do të tërhiqej plotësisht nga Gaza në fazën e tretë dhe të fundit dhe lufta do të përfundonte në mënyrë efektive.

Një burim i paidentifikuar i Hamasit dha një deklaratë të ngjashme.

Në përgjigje të raporteve, një zyrtar izraelit, duke folur në mënyrë anonime për mediat, përsëriti këmbënguljen e Jerusalemit se “Izraeli në asnjë rrethanë nuk do të pranojë të përfundojë luftën si pjesë e një marrëveshjeje për lirimin e të rrëmbyerve tanë”.

“IDF do të hyjë në Rafah dhe do të shkatërrojë batalionet e mbetura të Hamasit atje – pavarësisht nëse ka një pauzë të përkohshme për të liruar robërit tanë apo jo”.

Duke sinjalizuar mosmarrëveshje brenda udhëheqjes izraelite, ministri i kabinetit të luftës, Benny Gantz, i kritikoi ato komente.

“I këshilloj ‘burimet zyrtare’ dhe të gjithë vendimmarrësit e tjerë që të presin përditësimet zyrtare, të veprojnë me përmbajtje dhe të mos bëhen histerikë për arsye politike”, tha ai në një deklaratë, duke iu referuar me sa duket presionit të së djathtës ekstreme ndaj kryeministrit, Benjamin Netanyahu.

Gantz shtoi se kur Hamasi të dorëzojë një përgjigje, kabineti i luftës do të mblidhet për ta diskutuar atë.

Gazeta saudite “Asharq” raportoi gjithashtu se një marrëveshje ishte afër dhe bëri jehonë që Hamasi do të njoftonte përgjigjen e tij ndaj propozimit “në orët e ardhshme”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.