Florida miraton projektligjin për heqjen e statusit të taksave speciale të Disney-t

Në Florida, ligjvënësit kanë votuar për të revokuar aftësinë prej dekadash të Walt Disney-it për të qeverisur zonën përreth parkut të Walt Disney World.

Por ky veprim është parë si një hakmarrje nga guvernatori republikan i shtetit mbi kritikat e kompanisë ndaj politikave LGBTQ të administratës së tij.

Në mars, pas një proteste nga stafi mbi legjislacionin e Florida-s, Disney i pezulloi donacionet politike për guvernatorin Ron DeSantis dhe mbështetës të tjerë të projektligjit.

DeSantis, i cili është në garë për rizgjedhje dhe besohet se po peshon një opsion kandidimi për president në vitin 2024, që atëherë e ka denoncuar Disney-n si një korporatë “të zgjuar”.

Kompania, si një nga punëdhënësit më të mëdhenj në Florida, ka gëzuar privilegje në shtet që nga viti 1967, të cilat i kanë dhënë asaj autonomi mbi ujin, rrugët, shërbimet e urgjencës dhe lejimin në rreth 25 mijë hektarë pranë qytetit të Orlando-s.

Legjislacioni i miratuar, ndërkohë, do t’i japë fund autonomisë që gëzon Distrikti i Përmirësimit të Reedy Creek, siç njihet distrikti i taksave speciale të Disney-t, deri në qershor të vitit 2023.

Vetë Walt Disney kishte nxitur për privilegje të tilla pasi ishte i frustruar me lejet rreth Disneyland-it të Kalifornisë.

Mosmarrëveshja midis një guvernatori republikan dhe një prej kompanive më të shquara të shtetit është bërë kritike në luftërat kulturore mbi identitetin gjinor, protokollet COVID dhe politikën racore.

Këto të fundit janë përshkallëzuar teksa zgjedhjet afatmesme afrohen këtë vjeshtë.

“Disney dhe korporatat e tjera nuk do të shpëtojnë më nga fushatat e tyre të pakontrolluara të presionit”, u ka thënë DeSantis donatorëve.

Sakaq, ligji i Florida-s ndalon shkollat ​​nga udhëzimet për orientimin seksual dhe identitetin gjinor në klasat më të ulëta dhe çështje të tjera që nuk janë “të përshtatshme për moshën”.

Shefi ekzekutiv i Disney-t, Bob Chapek, ka thënë se është përpjekur të shmangte një mosmarrëveshje publike mbi projektligjin, duke lobuar kundër legjislacionit në prapaskenë.

Por pas protestave të punonjësve, Chapek ka kundërshtuar publikisht projektligjin.

Sidoqoftë, projektligji ka kaluar përmes legjislaturës së Florida-s.

Disney ka rreth 66 mijë punonjës në Florida dhe i ka paguar shtetit rreth 780 milionë dollarë taksë në vitin 2021.

Demokratët dhe zyrtarët lokalë kanë thënë se ligji ndoshta do t’i kalojë kostot e paguara nga Disney te taksapaguesit vendas.

Këtë javë, DeSantis u ka kërkuar ligjvënësve të zgjerojnë një seancë të posaçme të legjislaturës për të shqyrtuar përfundimin e distriktit Reedy Creek.

Të dyja dhomat kanë votuar për ta miratuar atë dhe projektligji tani do të shkojë në tryezën e DeSantis për t’u nënshkruar.

Megjithatë, hendeku i gjatë deri në zbatimin e tij vitin e ardhshëm do të lejojë kohë për negociata.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.