Tregtia e Kinës me Rusinë arriti një rekord prej 190 miliardë dollarësh

Tregtia e Kinës me Rusinë arriti një rekord prej 1.28 trilionë juanë (190 miliardë dollarë) vitin e kaluar, tha qeveria kineze të premten.

Kjo, edhe pse importet e Rusisë nga Bashkimi Evropian ranë për shkak të sanksioneve që lidhen me pushtimin e Ukrainës nga Moska.

Lajmi u bë i ditur nga agjencia “Reuters”.

Eksportet e Kinës në vitin 2022 dhe importet nga Rusia përbënin 3 për qind të tregtisë totale të Kinës, tha në një konferencë shtypi Lyu Daliang, zëdhënës i Administratës së Përgjithshme të Doganave.

Dërgesat e mallrave kineze në Rusi janë rritur për gjashtë muaj rresht.

Rusia dyfishoi eksportet e saj hekurudhore të gazit të lëngshëm të naftës në Kinë në vitin 2022 si pjesë e përpjekjes së Kremlinit për të diversifikuar shitjet e saj të eksportit të energjisë, tregoi të enjten një analizë e “Reuters” bazuar në të dhënat nga burimet e industrisë.

Sipas prodhuesit kryesor rus, “Gazprom”, importet e Kinës të gazit natyror rus përmes tubacionit “Power of Siberia” do të jenë rritur me të paktën 50 për qind në vitin 2022.

Importet e naftës bruto ruse të Kinës u zgjeruan 10 për qind në vit në 11 muajt e parë në afro 80 milionë tonë.

Tregtia e Kinës me Rusinë u ngadalësua ndjeshëm në terma dollarë në dhjetor, me eksportet që u rritën 8.3 për qind nga i njëjti muaj i vitit të kaluar, nga rritja e nëntorit prej 17.9 për qind, sipas llogaritjeve të “Reuters” bazuar në të dhënat e doganave kineze të së premtes.

Importet nga Rusia u rritën me 8.3 për qind, duke u ngadalësuar nga një rritje prej 28.5 për qind në nëntor, pasi një rritje e infeksioneve COVID-19 rëndoi kërkesën e brendshme në Kinë.

Por me heqjen e politikës së Pekinit për zero-COVID, megjithatë, Rusia dhe Kina janë të gatshme të rifillojnë udhëtimin e ndërsjellë sa më shpejt të jetë e mundur dhe të thellojnë bashkëpunimin e tyre strategjik, tha këtë javë Zhang Hanhui, ambasadori i Kinës në Rusi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.