Konservatorët francezë luftojnë për rëndësinë midis Macron dhe Le Pen

Opozita franceze e qendrës së djathtë, që nga humbja në zgjedhjet presidenciale dhe zgjedhjet parlamentare të këtij viti, është e shqetësuar për mënyrën më të mirë për të rindërtuar një forcë kombëtare.

Një forcë të besueshme dhe të denjë për themeluesin Charles de Gaulle.

Les Républicains (LR), trashëgimtarë të partive konservatore që prodhuan shumicën e presidentëve të pasluftës, dështuan në zgjedhjet presidenciale.

Ata humbën gati gjysmën e vendeve të tyre në Asamblenë Kombëtare. Sakaq, po kërkojnë udhëheqje të re.

Edhe aleanca qendrore e Presidentit Emmanuel Macron që humbi shumicën legjislative, po provon një përzierje të re.

Por kjo rrit rrezikun që votuesit ta shohin LR-në si një partner të vogël në një koalicion de facto me një president jopopullor.

Po ashtu ajo përballet me Rassemblement National të krahut të djathtë të udhëhequr nga Marine Le Pen, e cila tani është partia më e madhe opozitare në asamble.

Dhe që beson se ka një rrugë drejt pushtetit në pesë vjet.

Për LR-në, rruga e kthimit do të jetë e vështirë. Kështu sugjeron Michel Barnier, një burrë shteti i vjetër i LR-së dhe njeriu që udhëhoqi negociatat e Brexit-it për BE-në.

“Nëse nuk arrijmë të rindërtojmë një qendër të besueshme të djathtë, ekziston rreziku që Marine Le Pen të fitojë pushtetin. Kemi humbur terren kudo, në zonat urbane, dhe megjithëse kemi qëndruar në zonat rurale, ka qenë e vështirë edhe atje, kemi humbur të rinjtë, kemi humbur departamentet jashtë shtetit”.

Krahu i majtë dhe i djathtë i partisë po tërhiqen në drejtime të ndryshme.

Macron, që nga viti 2017, ka grabitur mbështetës dhe deputetë nga ish-kampi. Kurse Le Pen dhe politikat e saj të vijës së ashpër mbi emigracionin dhe ligjin duken gjithnjë e më tërheqëse për ata në të djathtë të partisë.

Ndonjëherë anëtarët e partisë nuk pajtohen për strategjinë, taktikat dhe politikat bazë, siç është qasja më e mirë ndaj shpenzimeve publike.

Pa një lider përpara një konference partie të planifikuar për në dhjetor, personalitete të ndryshme janë duke u përpjekur për pozicione.

Dy nga kandidatët për lidership simbolizojnë ekstremet e partisë.

Njëri është Aurélien Pradié, i cili mbron ndërtimin e një partie popullore që i ndihmon njerëzit në betejat e tyre të përditshme ekonomike dhe që beson se obsesioni i së djathtës me identitetin kombëtar dhe imigracionin është një shpërqendrim.

Në të kundërt, Eric Ciotti, një tjetër pretendente, dëshiron të mbajë një qëndrim shumë më të ashpër ndaj imigracionit dhe krimit.

Si një social konservatore 56-vjeçare, ishte afër të mposhtte Valérie Pécresse-në më të moderuar kur partia zgjodhi kandidatin e saj presidencial vitin e kaluar.

Në një takim të fundit strategjik të zyrtarëve të lartë të LR-së, Pradié ngriti mundësinë që partia të shpërbëhej. “Ky nuk është rezultati që unë shpresoj, por nëse nuk e bëja pyetjen, atëherë askush tjetër nuk do ta bënte”.

Ndërsa Ciotti u përgjigj duke thënë se të gjithë do të kishin një vend nëse ai drejtonte partinë. “Gjithçka duhet të rindërtohet”.

Fati i LR-së varet pjesërisht nga mënyra se si ata e drejtojnë dinamikën parlamentare të mandatit të dytë të Macron.

Teksa një pakicë mbështeti hyrjen në një koalicion zyrtar me Macron në këmbim të një animi më të djathtë të politikës, partia vendosi të mbetet në atë që e quajti “opozitë konstruktive” ndaj qeverisë.

Olivier Marleix, i cili kryeson grupin LR në asamblenë kombëtare dhe ka qenë një kritik i zëshëm i Macron, ka thënë se partia do të “refuzonte të ishte opozita e zbutur e qeverisë”.

Megjithatë, ai dhe grupi i tij kanë votuar me shumicë dërrmuese me qeverinë për legjislacionin muajin e kaluar.

Qeveria iu drejtua me këmbëngulje deputetëve të LR-së për të mbështetur dy projektligje që synojnë të ndihmojnë njerëzit dhe bizneset të përballen me inflacionin dhe rritjen e çmimeve të energjisë.

Nga ana tjetër, ata miratuan disa nga propozimet e LR-së.

Të dy projektligjet kaluan në masë të madhe për shkak të mbështetjes nga LR-ja.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.