Konflikti në Mali: Macron njofton tërheqjen e trupave pas nëntë vjetësh

Franca dhe aleatët e saj, në një forcë evropiane, do t’i tërheqin trupat e tyre nga Mali pas pothuajse një dekade.

Lajmin e ka njoftuar presidenti francez, Emmanuel Macron.

Trupat janë përfshirë në luftën kundër militantëve islamikë në vend që nga viti 2013.

Macron tha se vendimi për t’u larguar pasoi në një thyerje të marrëdhënieve diplomatike, në mes të armiqësisë në rritje nga junta ushtarake qeverisëse e Malit.

Forcat do të ridislokohen diku tjetër, në rajonin Sahel të Afrikës.

“Ne nuk mund të mbetemi të angazhuar ushtarakisht përkrah autoriteteve de-facto, strategjinë dhe synimet e fshehura të të cilave nuk i ndajmë”, tha Macron në një konferencë shtypi në Paris të enjten.

Ai mohoi se misioni kishte qenë një dështim dhe këmbënguli se Franca mbeti e përkushtuar për të luftuar kryengritjet islamike në rajon. Ai shtoi se Nigeri kishte rënë dakord për të pritur disa nga forcat që tërhiqeshin.

“Franca ka luajtur një rol unifikues në këtë mobilizim ndërkombëtar në favor të Sahel-it”, tha ai, duke shtuar se, “ne do të vazhdojmë të sigurojmë këtë rol unifikues”.

Tërheqja e planifikuar, e cila pritet të ndodhë gjatë një periudhe katër deri në gjashtë muaj, u njoftua pas takimit të liderëve evropianë dhe afrikanë në Pallatin Elysée të mërkurën mbrëma.

Në një deklaratë të lëshuar të enjten në mëngjes, vendet e përfshira në Task Forcën Takuba të udhëhequr nga Franca thanë se kishin rënë dakord për të përcaktuar plane sesi të mbeten të përfshirë në mënyrë aktive në rajon, më së shumti në Niger dhe në vendet e Gjirit të Guinesë, deri në qershor.

Koloneli Souleymane Dembélé, zëdhënës i juntës në pushtet, e hodhi poshtë njoftimin e Francës, duke u thënë gazetarëve se, ndërsa forcat evropiane ishin në vend, “terrorizmi përfshiu të gjithë territorin e Malit”.

Pothuajse 5 mijë trupa franceze janë vendosur në rajonin e Sahel-it për të luftuar kryengritjet islamike si pjesë e Operacionit Barkhane, me rreth 2 mijë e 400 prej tyre të vendosura në tri baza në Malin Verior.

Por marrëdhëniet midis Francës dhe Malit, i cili është një nga vendet më të varfra në botë, janë përkeqësuar që kur ushtria mori pushtetin për herë të parë në një grusht shteti në gusht 2020.

Dhe tensionet u rritën më tej muajin e kaluar, kur junta hoqi dorë nga një marrëveshje për të rregulluar zgjedhjet në shkurt dhe u zotua të mbante pushtetin deri në vitin 2025, duke çuar përfundimisht në dëbimin e ambasadorit francez.

Në dhjetor, më shumë se një duzinë vende perëndimore dënuan gjithashtu vendosjen e mercenarëve nga grupi Wagner me bazë në Rusi në Mali.

Grupi ka qenë i përfshirë në disa konflikte të mëdha, duke përfshirë në Siri, Mozambik, Sudan dhe Republikën e Afrikës Qendrore (CAR).

Macron paralajmëroi të enjten se grupi kishte ardhur “në thelb për të siguruar interesat e tyre ekonomike dhe vetë juntën”.

Lajmi për tërheqjen franceze u prit me reagime të ndryshme në Mali.

Tërheqja do të ketë implikime sigurie për vendet e tjera në rajonin e Sahel-it, të cilët janë përballur me kryengritjet e tyre islamike.

Presidenti i Bregut të Fildishtë, Alassane Ouattara, paralajmëroi se masa krijoi “një vakum” që do të rriste barrën mbi qeveritë rajonale.

Por presidenti senegalez Macky Sall tha se ai e kuptonte pse Franca kishte vendosur të tërhiqte trupat e saj nga Mali dhe se ai ishte i siguruar se lufta kundër militantëve islamikë në Sahel do të vazhdonte.

Ndërkohë, presidentja e Ghana-ës, Nana Akufo-Addo, tha se ishte e rëndësishme që një forcë paqeruajtëse e Kombeve të Bashkuara të mbetej aktive në Mali, pavarësisht largimit francez.

Një zëdhënës i OKB-së tha se “do të kishte një ndikim” në operacionet e saj.

Dyshime janë hedhur gjithashtu mbi të ardhmen e një misioni trajnimi ushtarak të BE-së në Mali, pasi ministrja gjermane e Mbrojtjes, Christine Lambrecht, u tha gazetarëve se ishte “shumë skeptike” se Berlini do të mbetej i përkushtuar ndaj misionit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.