Kinë/ Ringrihet lëvizja #MeToo pas rasteve të ngacmimeve seksuale

Në Kinë, përpjekjet e lëvizjes #MeToo për të trajtuar diskriminimin dhe ngacmimin e përhapur në vend janë ringjallur për shkak të një rritje të zemërimit të publikut mbi një sërë rastesh të sulmeve seksuale të profilit të lartë.

Megjithatë, aktivistët e të drejtave të grave kanë paralajmëruar se partia komuniste kineze në pushtet ka mbetur e kujdesshme ndaj aktivizmit masiv feminist, i cili vazhdon të vuajë nga censura dhe sulmet nacionaliste.

Agjencia e lajmeve, “Financial Times”, tregon se Kris Wu, i famshmi kanadezo-kinez, u arrestua zyrtarisht nga policia e Pekinit nën dyshimin për përdhunim pasi një influencues i njohur si Du Meizhu, një student 19-vjeçar, e akuzoi atë për përdhunim dhe joshje të vajzave të mitura.

Wu është ndër më të famshmit që përballet me akuza penale që kur lëvizja globale #MeToo zuri rrënjë në Kinë në vitin 2018. Edhe pse Wu i ka mohuar akuzat.

Këtë muaj, një punonjëse te Alibaba akuzoi shefin e saj dhe klientët e biznesit për sulm seksual ndaj saj në një llogari të publikuar në internet pasi ajo ishte vënë nën presion për të pirë në një event pune. Kjo bëri që policia të ndalonte dy burra fundjavën e kaluar.

Fakti që policia reagoi ndaj dy akuzave publike ka ringjallur shpresën në lëvizjen #MeToo të Kinës, edhe pse aktivistët kanë hezituar t’i atribuojnë veprimet e zbatimit të ligjit në këto raste tolerancës më të madhe nga partia komuniste për kauzën e tyre.

“Ne të gjithë e dimë për goditjen e lëvizjeve civile në Kinë, kështu që ne nuk duam që raste të tilla të bëhen një justifikim për qeverinë për të forcuar fuqinë e tyre dhe për të ndëshkuar kompani ose industri të caktuara”, ka thënë Xiong Jing, aktiviste feministe. “Ky është shqetësimi im, por nuk mund të bëjmë shumë për këtë”.

“Financial Times” shkruan se frika është veçanërisht e theksuar në rastin e industrive të argëtimit dhe teknologjisë, të cilat po përballen me presionin për të “korrigjuar” sjelljen që partia e konsideron të dëmshme për vizionin e saj për një shoqëri të shëndetshme dhe të qëndrueshme.

Nga ana tjetër, media shtetërore kineze i ka shmangur veçanërisht të drejtat e grave në komentet e saj mbi akuzat kundër Wu dhe menaxherit te Alibaba, të cilët kompania ka zbuluar se që atëherë ishin pushuar nga puna.

Gazeta zyrtare e partisë, “People’s Daily”, e ka nxjerrë skandalin te Alibaba si një qeverisje korporative, duke shkruar se “thelbi është, çfarë lloj kulture mbron dhe vendos një biznes?”.

Në rastin e Wu, gazeta e partisë shënjestroi kulturën obsesive të bizneseve dhe sjelljen e keqe të të famshmëve, duke shkruar se “nëse përdorni famën për të kënaqur dëshirat egoiste, rezultati përfundimtar do të jetë vetë-shkatërrimi”.

Ndërkohë, feministet kineze nuk e kanë mohuar se ndryshimi i kulturës së punës të dominuar nga meshkujt dhe narcizmi i famshëm në industrinë e argëtimit ishin hapa të rëndësishëm drejt luftimit të ngacmimeve dhe sulmeve.

Por gjithashtu kanë shpresuar për një njohje më të gjerë zyrtare të diskriminimit gjinor dhe ngacmimit seksual, si dhe mbrojtje më të fortë ligjore për gratë që flasin.

Aktivistët kanë treguar se veprimi i policisë kundër Wu dhe ish-menaxherit te Alibaba mund të jetë kritik për ngritjen e vetëdijes për ngacmimet dhe sulmet seksuale sepse kishte prova të forta për të mbështetur akuzat.

“Këto janë raste shumë të veçanta sepse shumë nga rastet e mëparshme #MeToo (në Kinë) vareshin nga kujtimi i ngjarjeve që kanë ndodhur shumë vite më parë”, ka dalluar Xiong.

Në vitin 2018, një vazhdimësi e shpejtë e akuzave #MeToo mbi ngacmimin seksual në universitete, organizata jofitimprurëse dhe media tërhoqi vëmendjen e publikut.

Por lëvizja është zbehur nga popullariteti publik pasi u përball me censurë të përhapur, sulme online ndaj aktivisteve feministe dhe ngecje në përparimin e rasteve të profilit të lartë.

Sipas “Financial Times”, një padi historike për ngacmimin seksual kundër Zhu Jun, një nga drejtuesit më të shquar të televizionit shtetëror kinez, u ndal në dhjetor pasi ai nuk pranoi të përballej me akuzuesin e tij në gjykatë. Madje, Zhu i mohoi akuzat.

Rasti erdhi pasi në vitin 2018, Zhou Xiaoxuan, e akuzoi Zhu se ishte përpjekur ta puthte atë kur ajo ishte një praktikante 21-vjeçare në median shtetërore. Kurse më vonë, Zhu e paditi Zhou për shpifje.

Fyerja dhe censura në internet nuk janë ndalur.

Këtë muaj, një blog kinez i të drejtave të punës të grave në WeChat, i quajtur Pepper Tribe njoftoi se po mbyllej, një veprim që mbështetësit thanë se pasqyronte zvogëlimin e tolerancës ndaj aktivizmit.

Në prill, komentatorët nacionalistë filluan sulme ndaj një numri feministësh të njohur kinezë, duke i akuzuar ata se punonin me “forcat e huaja”. Në maj, u mbyllën gjithashtu edhe një grup blog-esh studentësh në WeChat që ngritën vetëdijen për çështjet LGBT+.

“Festimi i këtij momenti dhe parashikimi i perspektivave të ndritshme janë gjëra krejtësisht të ndryshme”, ka shkruar në një postim në blog Lü Pin, themeluesja e botuesit online kinez, Feminist Voices.

“Shumë viktima ende nuk kanë zë, shumë llogari vazhdojnë të zhduken, të drejtat e grave janë ende një forcë reaksionare”, ka thënë ajo. “Kohët e fundit, e kam pyetur veten shumë herë: si mund të vazhdojë lëvizja jonë? Rrëzimi i Kris Wu nuk mund të japë një përgjigje”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.