Dushan Janjiç nga Forumi për Marrëdhënie Etnike në Beograd, në një intervistë për për N1 të Sarajevës, ka deklaruar se situata aktuale në Veri dhe shpërthimi eventual mund të “ndezë automatikisht konfliktet në Serbi, Bosnjë e Hercegovinë dhe Mal të Zi” dhe “t’ia fus flakën Ballkanit”.
Ai shtoi se, normalisht ajo çfarë po ndodhë në veri aktualisht është “një zjarr i vogël që mund të shuhet me pak rërë”, por problemi sipas tij është se “atë rërë nuk e shohim askund”.
Janjiç pohoi se situata në veri është “një shfaqjeje shumë e rrezikshme në të cilën po marrin pjesë pothuajse të gjithë”.
“Kjo është shfaqja që kemi parë kur filluan luftërat në Jugosllavi. Dihej se nëse Vuçiç tërhiqte serbët nga institucionet e Kosovës, do të vendosej një realitet i ri. Prishtina nuk e njohu atë lëvizje. Një gjë e ngjashme i ka ndodhur edhe Millosheviç-it, i cili gjithashtu nuk e ka njohur realitetin. Në asnjë moment nuk kemi marrë vesh nëse ka pasur diskutime se si të garantohet siguria pasi lanë serbët nga policia dhe duke forcuar ‘formacionet serbe’ siç quhen tashmë, sepse ato ekzistojnë dhe ky është realiteti”, tha Janjiç.
Ai ka theksuar gjithashtu se zgjedhjet në veri të Kosovës të paralajmëruara për 18 dhjetor nuk do të mbahen.
“Serbia nuk mund të tërhiqet tani derisa të diskutohen mekanizmat për kthimin e serbëve në institucione ose do të krijojnë institucione paralele ose do të shkojnë një hap më tej”, thotë ai.
Janjiç shton se njoftimi nga Beogradi se po mendohet për kthimin e ushtrisë serbe në Kosovë nuk meritojnë as të komentohen.
“Drejtori i Zyrës për Kosovë Petar Petkoviç i hedh benzinë zjarrit që tashmë po digjet”.
“Njerëz të tillë duhet të vendosen në strehë emergjente sepse po bëjnë punën e gabuar me performancat e tyre. Është e gabuar në këtë moment, ndërkohë që lufta në Ukrainë po vazhdon dhe Serbia është gjithnjë e më e izoluar, të mendosh se NATO duhet të ndërhyjë. Duhet të bëhet një bisedë racionale mes Vuçiç-it, Kurtit, NATO-s dhe Grupit të Kontaktit, të cilët aktualisht janë në gjumë”.
“Bashkimi Evropian po bën diçka të gabuar. Është një situatë shumë urgjente dhe rajonit mund t’i vihet flaka. Kjo është arsyeja pse meriton shumë më shumë vëmendje”, pohoi Janjiç për N1.
“Të gjithë e dimë se ku është veriu i Kosovës. Është pjesë e ish Sanxhakut historik. Ai lidhet drejtpërdrejt me veriun e Malit të Zi dhe nëpërmjet Foçës me Bosnjën dhe Hercegovinën, për të mos përmendur linjën ndëretnike. Unë nuk mund të vizatoj një hartë për këdo që nuk e di këtë. Është një rajon që ndez automatikisht konfliktet në këto tre vende. Në Serbi, kjo do të shkaktonte një ndarje etno-kombëtare, në Bosnje dhe Hercegovinë do të tërhiqte aspiratat e Dodik dhe të tjerëve për t’u larguar, dhe ne tashmë kemi një situatë të paqëndrueshme në Mal të Zi”.
Ai shton se ka një skenar realist që situata të qetësohet nëse Grupi i Kontaktit flet me një gjuhë.
“Duhet të ketë një demonstrim të qartë të forcës, por jo nga Kosova apo Serbia. Realiteti i ri është se serbët janë larguar nga institucionet e Kosovës. Vullneti i tyre politik është i drejtuar drejt autonomisë ose shkëputjes. Pse nuk po qetësohet situata? Ndoshta ka lojtarë në grupin e Kontaktit që janë të kënaqur me transferimin e një pjese të konfliktit këtu, në mënyrë që të mos përjetojnë një barrë të madhe përmes Ukrainës. Është një situatë shumë delikate. Ky është një zjarr i vogël që mund të shuhet me pak rërë, por atë rërë nuk e shohim askund”, përfundoi ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
