Izraeli nuk do të dorëzohet ndaj kërkesës së Hamasit për t’i dhënë fund luftës, thotë Netanyahu

Izraeli është i përgatitur të ndalojë përkohësisht luftën në Gaza për të fituar lirimin e pengjeve të mbajtura atje, por nuk do të pajtohet me kërkesën e Hamasit për t’i dhënë fund luftës plotësisht.

Kështu deklaroi kryeministri Benjamin Netanyahu.

Izraeli dhe Hamasi kanë negociuar për javë të tëra përmes ndërmjetësve drejt një armëpushimi të mundshëm që do të përfshinte lirimin e pengjeve të mbajtura në Gaza dhe të të burgosurve palestinezë të mbajtur në Izrael.

“Ne nuk jemi gati të pranojmë një situatë në të cilën batalionet e Hamasit të dalin nga bunkerët e tyre, të marrin sërish kontrollin e Gazës, të rindërtojnë infrastrukturën e tyre ushtarake dhe të kthehen në kërcënimin e qytetarëve të Izraelit në vendbanimet përreth, në qytetet e jugut, në të gjitha pjesët e vendit”, tha Netanyahu në një deklaratë të dielën.

Hamasi, jo Izraeli, po e pengon një marrëveshje, shtoi ai.

Dorëzimi ndaj kërkesave të Hamasit do të ishte një “humbje e tmerrshme” për Izraelin, një fitore e madhe për Hamasin dhe Iranin dhe do të projektonte një “dobësi të tmerrshme” për miqtë dhe armiqtë e Izraelit, theksoi Netanyahu, sipas një deklarate të lëshuar nga zyra e tij.

Shefi politik i Hamasit, Ismail Haniyeh tha në një deklaratë se grupi po sjell “seriozitet dhe pozitivitet” në bisedimet aktuale.

Hamasi kreu një sërë kontaktesh me ndërmjetësit dhe me fraksionet e rezistencës dhe mbajti takime dhe konsultime intensive përpara se të dërgonte delegacionin e tij në Kajro.

Në përgjigje, ministri izraelit i Mbrojtjes Yoav Gallant tha se ai sheh indikacione se Hamasi nuk dëshiron një marrëveshje, e cila do t’i hapte derën aktivitetit ushtarak “intensiv” në Rafah.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.