Izraeli do të presë tre ministrat e Jashtëm arabë në një takim historik

Izraeli ka njoftuar se do të presë një samit të dielën dhe të hënën me diplomatët më të lartë nga Shtetet e Bashkuara, Emiratet e Bashkuara Arabe, Bahreini dhe Maroku.

E paimagjinueshme vetëm gjysmë dekade më parë, takimi i nivelit të lartë pasqyron ritmin me të cilin normat dhe aleancat e Lindjes së Mesme kanë ndryshuar që kur Izraeli nënshkroi marrëveshjen diplomatike historike me Emiratet e Bashkuara Arabe, Bahreinin dhe Marokun në vitin 2020.

Ministri i Jashtëm izraelit, Yair Lapid, do të presë konferencën, në të cilën ministria e tij njoftoi të premten se do të marrë pjesë edhe Sekretari Amerikan i Shtetit, Antony J. Blinken, ministri i Jashtëm i Emirateve, Abdullah bin Zayed Al Nahyan, ministri i Jashtëm i Bahrejnit, Abdullatif bin Rashid Al Zayani, dhe Nasser Bourita, homologu i tyre maroken.

Nëse do të vazhdojë siç është planifikuar, samiti do të jetë mbledhja e parë e këtij lloji në tokën izraelite.

Ajo do të zhvillohet në sfondin e luftës në Ukrainë, e cila ka rritur presionin ndërkombëtar mbi Emiratet e Bashkuara Arabe për të rritur prodhimin e naftës në mënyrë që të reduktohet ndikimi rus dhe frika për mungesën e ushqimit në Marok, i cili pjesërisht mbështetet në importet e drithërave nga Rusia dhe Ukraina.

Kryeministri i Izraelit, Naftali Bennett, ka luajtur gjithashtu një rol kyç si ndërmjetësues midis dy palëve.

Takimi do të ndodhë gjithashtu ndërsa negociatat e udhëhequra nga Perëndimi për të bindur Iranin që të zvogëlojë programin e tij bërthamor vazhdojnë.

Momenti i takimit pasqyron sesi frika e përbashkët për një Iran bërthamor – si dhe shqetësimet e përbashkëta për tërheqjen e perceptuar të Shteteve të Bashkuara nga rajoni, dhe mundësitë e ofruara nga lidhjet më të mëdha ekonomike midis Izraelit dhe botës arabe – tani duket se janë një prioritet më i madh për disa qeveri arabe sesa një zgjidhje e menjëhershme për konfliktin izraelito-palestinez.

Izraeli u përjashtua për vite me radhë nga të gjitha, përveç dy vendeve arabe, Egjiptit dhe Jordanisë, pasi një pjesë e madhe e botës arabe refuzoi të normalizonte lidhjet deri në krijimin e një shteti palestinez. Por kjo ndryshoi në vitin 2020, kur Izraeli vendosi marrëdhënie diplomatike me Emiratet e Bashkuara Arabe, Bahrein dhe me Marokun.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.