FSK mund të zbarkojë në Kuvajt për të mbështetur misionet e amerikanëve në Irak

Kuvendi i Kosovës ka miratuar edhe projektligjin për Ratifikimin e Marrëveshjes për Statusin e Forcës (SOFA), në mes Republikës së Kosovës dhe Shtetit të Kuvajtit.

Kjo i mundëson Forcave të Sigurisë së Kosovës, lehtësimin dhe zgjerimin për bashkëzbarkim me forcat aleate amerikane edhe në operacione tjera paqeruajtëse.

Ministri i Mbrojtjes, Armend Mehaj, përmes një postimi në rrjetin social ‘Facebook’, ka thënë se kjo marrëveshje lejon dhe rregullon qëndrimin e përkohshëm dhe atë tranzit të Forcës së Sigurisë së Kosovës në territorin e Shtetit të Kuvajtit për pjesëmarrje dhe mbështetje në misionet e forcave të SHBA-së në Republikën e Irakut.

“Kjo marrëveshje është iniciuar me rastin e fillimit të planifikimeve për pjesëmarrjen e FSK-së në bashkë-zbarkimin e parë me forcat amerikane në Kuvajt, por që nuk është arritur të finalizohet në kohë”, shkruan tutje Mehaj.

Ndërsa, tutje ka bërë të ditur se Kosova ka shprehur interesim për pjesëmarrje në misione të tjera bashkë-zbarkimi me forcat e Shteteve të Bashkuara të Amerikës (SHBA).

“Miratimi i këtij projekt-ligji e bën më të lehtë mundësinë e realizimit të misioneve të ardhshme të bashkë-zbarkimit me forcat amerikane në territorin e Shtetit të Kuvajtit”.

Me mbështetje të deputetëve të opozitës dhe pozitës, Kuvendi ka votuar në parim edhe Projektligjin për policinë ushtarake në Forcën e Sigurisë së Kosovës.

Ndryshe FSK, misionin e parë paqësor jashtë vendit, e kishte bërë në Kuvajt në mars të vitit të kaluar.

Kontingjenti i FSK-së që shkoi në Kuvajt, ishte pjesë e Gardës Kombëtare të Ajovas.

Kosova ka partneritet shtetëror me Ajovan, Garda Kombëtare e së cilit ndihmon FSK-në në ngritjen e saj dhe konsolidimin në ushtri.

Më 2018, përmes ndryshimeve ligjore ka nisur transformimi i mandatit të FSK-së në forca të armatosura, proces ky që pritet të zgjasë dhjetë vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.