Bislimi përfundon vizitën në Suedi: Përkushtimi ynë në rrugën drejt BE-së, do të vijojë pareshtur

Zëvendëskryeministri i Kosovës, Besnik Bislimi, vizitën e tij në Suedi e ka përshkruar si forcim i mesazhit se “Kosova është e gatshme të vijojë rrugëtimin e saj drejt sukseseve të reja në procesin e Integrimit Evropian”.

Atje, Bislimi është takuar me Ministren për Çështje Evropiane, Jesika Rosswall dhe dy Sekretarët e Shtetit përkatësisht për Çështje Evropiane dhe për Punë të Jashtme, Christian Danielsson dhe Jan Knutsson.

Ai tha se në këto takime “u evidentuan arritjet në kuadër të proceseve të Integrimit Evropian si liberalizimi i vizave dhe kalimi i etapës së parë në anëtarësimin në Këshillin e Evropës”.

“Shfaqëm nevojën për të ecur tutje në fazat e ardhshme me aplikimin për anëtarësim në BE, të cilat do ishin fillimisht marrja e pyetësorit e më tej statusi i vendit kandidat”, shkroi ai në Facebook.

Ndërkaq, zëvendëskryeministri i parë potencoi se |”shtatë vite pas nisjes së zbatimit të Marrëveshjes së Stabilizim Asocimit, vendi ka bërë përparim të dukshëm në përmbushjen e reformave dhe agjendës evropiane”.

“Do të vazhdojmë të dëshmojmë se do të bëjmë dhe më shumë e të meritojmë më shumë”, tha ai.

Përveç se me zyrtarë suedezë, Bislimi njoftoi se është takuar edhe me diasporën shqiptare që jeton në Suedi, në pritjen e organizuar nga ambasada e Kosovës atje.

“Në mesin e tyre dhe ish studentë të mi dhe bashkëkombës tanë të cilët shkëlqejnë në fusha të ndryshme dhe treguan për historitë e tyre të suksesit”, përfundoi ai.

Ndryshe, më 15 dhjetor të vitit të kaluar, Kosova ka dorëzuar aplikacionin për anëtarësim në Bashkimin Evropian nën presidencën çeke.

Prej 1 janarit deri më 30 qershor të këtij viti Presidencën e Këshillit të BE-së e mban Suedia.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.