BE-ja e “paralizuar”, ta ndalojë apo jo importin e naftës dhe gazit rus?

Bashkimi Evropian po punon për paketën e gjashtë të sanksioneve kundër Rusisë – por arma më e fortë do të mungojë sërish.

Komisioni i BE-së vazhdon të ngurrojë për të përdorur armën më efektive ekonomike: ndalimin e importit për furnizimet me naftën dhe gazin rus.

Ndërsa diskutimi rreth një embargoje evropiane ndaj furnizimeve ruse të energjisë nuk ndalet.

Disa vende të BE-së janë me vendosmëri kundër ndalimeve të importit. Gjermania dhe Austria, të cilat e marrin pjesën më të madhe të gazit natyror nga Rusia, janë shprehur fuqishëm kundër ndalimit të furnizimeve me naftë dhe gaz, derisa të gjejnë burime të mjaftueshme alternative të furnizimit.

Varësia nga furnizimet ruse me energji duhet të reduktohet – por në një mënyrë të tillë që të mos dëmtojë më shumë vendet e prekura të BE-së sesa Rusinë.

Borrell, i frustruar me shtetet anëtare

Hungaria ka përjashtuar kategorikisht një ndalim importi. Kryeministri i rizgjedhur së fundmi, Viktor Orbán, është i afërt me presidentin rus Vladimir Putin, aq sa i ka mbështetur sanksionet e tjera të BE-së kundër Rusisë “me gjysmë zemre”.

Kohët e fundit, Orbán deklaroi se do të vërë veton ndaj çdo forme të embargos së energjisë – një veprim i tillë do të “vrasë” Hungarinë.

Kjo është zhgënjyese për përfaqësuesin e lartë të politikës së jashtme në BE, Josep Borrell.

“Disa shtete anëtare kanë thënë shumë qartë se nuk do të mbështesin një embargo apo tarifë ndëshkuese për naftën ose gazin rus. Kjo do të thotë se ne nuk kemi ende unanimitet në BE për të vendosur një embargo apo një tarifë në këtë pikë”, tha politikani spanjoll.

Ky i fundit, shtoi se, “një propozim përfundimtar për një embargo ndaj naftës dhe gazit nuk është ende në tryezë. Prandaj është kaq e rëndësishme që të ketë konsensus mes kryeqyteteve për masat e ardhshme”.

Në parim, një embargo e naftës ka më shumë gjasa sesa një ndalim i importit të gazit, sepse është më e lehtë për vendet e BE-së të gjejnë furnizues alternativë. Shumë prodhues në mbarë botën mund të rrisin prodhimin e tyre, të paktën në afat të mesëm.

Shembulli i Gjermanisë tregon se sa shpejt mund të gjenden furnizues të rinj të naftës.

Republika Federale merr një të tretën e naftës së saj nga Rusia dhe, për këtë arsye, është më e varur nga Rusia në këtë fushë sesa shumica e vendeve të tjera të BE-së.

Pavarësisht kësaj, qeveria federale ka deklaruar se synon të ndalojë përdorimin e naftës ruse deri në fund të vitit. Nëse sigurohen furnizimet, ajo mund të pajtohet me një embargo nafte.

Lëndimi i Rusisë pa dëmtuar vendet e tjera

Qeveria amerikane kishte paralajmëruar një embargo evropiane të naftës të enjten.

“Në afat të mesëm, Evropa duhet të zvogëlojë varësinë e saj nga Rusia për energji. Por ne duhet të jemi të kujdesshëm kur flasim për një embargo totale evropiane për gjëra të tilla si nafta”, u tha gazetarëve Sekretarja e Thesarit të SHBA-ve, Janet Yellen, në takimin vjetor të Fondit Monetar Ndërkombëtar.

Është për të dëmtuar Rusinë, por një embargo e naftës e BE-së “do të rriste qartë çmimet e naftës në mbarë botën dhe do të dëmtonte Evropën dhe pjesë të tjera të botës”.

Pas vizitës së Presidentes së Komisionit Evropian, Ursula von der Leyen, në Ukrainë, po bëhet presion i madh për të ndaluar eksportet ruse të energjisë në Evropë.

Një sërë alternativash po diskutohen aktualisht në Bruksel.

Kryeministri i Italisë, Mario Draghi, ka propozuar vazhdimisht një kufi çmimi si një alternativë ndaj sanksioneve të naftës dhe gazit. Konsumatorët e naftës në vendet e BE-së do të detyrohen të paguajnë më pak për naftën ruse sesa kërkon Rusia.

Kur bëhet fjalë për gazin, është më e vështirë të biesh dakord për një embargo

Ekonomistët kryesorë mbrojnë gjithashtu një tarifë ndëshkuese për naftën dhe gazin rus.

Gjithashtu flitet për t’i dhënë Rusisë vetëm një pjesë të parave për furnizimet me naftë e gaz dhe një pjesë tjetër do ta drejtojë në një llogari ruajtjeje, ku do të ngrihet derisa Moska të përfundojë luftën.

Është gjithashtu e mundur të sanksionohen vetëm disa lloje vaji që janë veçanërisht të lehta për t’u zëvendësuar.

Në rastin e gazit, dakordimi për një embargo është përgjithësisht shumë më i vështirë, sepse kërkon më shumë kohë për të zhvilluar burime alternative.

Vendet e BE-së janë në proces të pavarësimit nga gazi rus me forcë të plotë, tha Borrell.

Kryediplomati i BE-së supozon se vendet e tjera anëtare do të shpallin marrëveshje të reja me furnizuesit alternativë në ditët në vijim.

Në fund të javës së kaluar, qeveria holandeze njoftoi se vendi do të jetë i pavarur nga gazi dhe nafta ruse deri në fund të vitit. Megjithatë, kjo është më e lehtë për Holandën sesa për shembull Gjermaninë.

Në Holandë, e cila ka vetë depozita gazi, furnizimet ruse përbëjnë vetëm 15 për qind të gazit natyror të konsumuar. Në krahasim me Gjermaninë është 55 për qind.

Borrell gjithashtu pranon se vendet e BE-së dhe vetë Bashkimi ishin shumë naivë ndaj Putin-it.

“Evropa e kuptoi shumë vonë se sa i rrezikshëm është Putin-i”, tha Borrell, duke theksuar se, “ne duhet ta kishim reduktuar varësinë tonë nga nafta dhe gazi rus shumë më herët, dhe me të drejtë mund të kritikohet se nuk e bëmë këtë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.