Osmani kërkon nga ministrja e Katarit rritje të bashkëpunimit

Presidentja e Kosovës, Vjosa Osmani, pas takimit me ministren për Zhvillim Sociale dhe Familje të Katarit, Maryam bint Ali bin Nasser Al-Misnad, ka bërë të ditur se ka falendëruar atë për përkrahjen që ka ofruar ndaj Kosovës shteti i Katarit për t’u anëtarësuar në organizata ndërkombëtare.

Përmes një komunikate dërguar mediave nga Zyra e Presidencës është thënë se Katari kishte qëndruar përkrah Kosovës edhe në periudha më të vështira.

“Presidentja Osmani ka theksuar se Kosova vlerëson thellësisht mbështetjen e vazhdueshme të Katarit, veçanërisht në ndihmën për anëtarësim në organizata ndërkombëtare, por edhe për ofrimin e ndihmave humanitare gjatë dhe pas luftës”, thuhet në komunikatë.

E para e shtetit tutje, ka kërkuar që të rritet bashkëpunimi mes Kosovës dhe Katarit.

“Presidentja Osmani ka nënvizuar rëndësinë e forcimit të mëtejshëm të raporteve me Katarin dhe në këtë kontekst ka përmendur fushën e mirëqenies sociale, mbështetjen për invalidët e luftës, sektorin e shëndetësisë, turizmin si dhe projekte të tjera investuese”.

Çështje e diskutimit ishte edhe përmirësimi i shërbimeve mbështetëse për familje.

“Në takim, ndër të tjera u diskutua edhe për zhvillimin dhe përmirësimin e shërbimeve mbështetëse të familjes, duke përfshirë programet e fokusuara në mirëqenien e fëmijëve dhe grave”.

“Të dy bashkëbisedueset shtruan nevojën për thellimin e bashkëpunimit dhe eksplorimit të nismave të përbashkëta nga të cilat do të përfitojnë të dy shtetet”.

Ministrja për Zhvillim Sociale dhe Familje të Katarit, Maryam bint Ali bin Nasser Al-Misnad, pas takimit me Osmanin ka nisur takim me kryeministrin e Kosovës, Albin Kurti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.