Mijëra serbë në rrugë – Çfarë po ndodh në Beograd?

Mijëra serbë kanë dalë të premten në rrugët e Beogradit, për të protestuar nën sloganin “Serbia kundër dhunës”, derisa janë dëgjuar duke bërtitur “Vuçiç, dorëhiqu”, dhe “Vuçiç, largohu”, raportojnë mediat serbe.

Po ashtu në një pankartë tjetër që po e mbanin protestuesit shkruante “Erë pranvere serbe”.

Protesta është organizuar nga partitë opozitare të Serbisë.

Arsyeja për organizim të protestës në Beograd është zhgënjimi me reagimin e autoriteteve, pas dy vrasjeve masive që kanë ndodhur në Serbi, në muajin maj, në të cilat janë vrarë 18 persona.

Pas organizimit fillestar, para Parlamentit të Serbisë, protestuesit kanë nisur ecjen nëpër rrugë.

Thirrjet e njëjta janë dëgjuar edhe përpara objektit të Qeverisë së Serbisë, ku janë mbajtur, po ashtu, protesta.

Një ditë para protestës, në Parlamentin e Serbisë kanë nisur diskutimet për situatën e sigurisë në shtet, dhe shkaqet që kanë çuar në dy vrasjet.

Mbajtja e një seance të tillë ka qenë kërkesë e protestuesve në marshet e kaluara.

Në mesin e kërkesave tjera ka qenë dorëheqja e ministrit të Policisë, Bratislav Gashiq dhe e drejtorit të Agjencisë së Informacionit dhe Sigurisë (BIA), Aleksandër Vulin.

Ata janë duke kërkuar edhe zëvendësimin e trupit rregullativ për mediat elektronike, mbylljen e tabloideve që, sipas tyre, bëjnë thirrje për dhunë, dhe për tërheqjen e frekuencave për televizionet Pink dhe Happy.

Pas tragjedisë që ka ndodhur në shkollën fillore “Vladislav Ribnikar”, Branko Ruzhiç ka dhënë dorëheqje nga pozita e ministrit të Edukimit.

Më 3 maj, një nxënës 13-vjeçar i ka vrarë tetë nxënës dhe një roje sigurimit, si dhe i ka plagosur gjashtë nxënës tjerë dhe një mësues.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.