Rritje e përpjekjeve terroriste në BE

Dy janë përpjekjet terroriste që ndajnë statistikën e vitit 2019 nga ajo e vitit 2020 – raporti 57 me 55.

Kjo, sipas raportit të Europol-it, të zbuluar para pak ditësh, mbi situatën e terrorizmit në Bashkimin Evropian (BE).

Në shifra përfshihen përpjekjet e suksesshme, të dështuara dhe të shkatërruara. Gjatë vitit 2020, 10 prej tyre ishin sulme terroriste xhihadiste në Austri, Francë dhe Gjermani.

Edhe pse ato përfaqësojnë vetëm një të gjashtën e të gjitha sulmeve në BE, terroristët xhihadistë ishin përgjegjës për më shumë se gjysmën e vdekjeve (12) dhe pothuajse të gjithë të plagosurve (47).

Numri i përgjithshëm i vdekjeve dhe plagosjeve në BE u dyfishua nga 10 vdekje dhe 27 të plagosur në vitin 2019, në 21 vdekje dhe 54 të plagosur në vitin 2020.

Gjithsej 14 sulme terroriste etno-nacionaliste dhe separatiste u zhvilluan në Francë dhe Spanjë, ndërsa 24 sulme u kryen nga organizata apo individë terroristë të majtë ose anarkistë, të gjithë në Itali.

Në shumicën e rasteve, këto sulme synonin pronën private dhe publike, siç janë institucionet financiare dhe ndërtesat qeveritare.

Në vitin 2020, tre vende të BE-së – Gjermania, Belgjika dhe Franca – dëshmuan katër përpjekje terroriste të motivuara nga ekstremizmi i krahut të djathtë.

Sidoqoftë, vetëm njëra prej tyre u përfundua.

Xhihadistët

Terrorizmi xhihadist mbetet kërcënimi më i madh për BE-në.

Në vitin 2020, numri i sulmeve terroriste xhihadiste të përfunduara ishte më shumë se dyfishi i komploteve të dështuara.

Sipas Europol-it, aktorët e vetëm prapa të gjitha sulmeve ishin xhihadistët, me katër nga dhjetë sulmet e suksesshme të kryera nga qytetarët e BE-së.

Disa nga aktorët e vetëm shfaqën një kombinim të ideologjive ekstreme dhe çështjeve të shëndetit mendor, me izolim shoqëror dhe stres të shtuar, si rezultat i pandemisë që dyshohet se ka luajtur rol në disa raste.

Arrestimet

Një total prej 449 arrestimesh të dyshuar për vepra terroriste u raportuan në Europol në vitin 2020.

Ky numër ishte dukshëm më i ulët se në vitin 2019 (1 mijë e 4).

Mbetet e paqartë nëse kjo rënie është për shkak të zvogëlimit të aktivitetit terrorist apo është rezultat i zvogëlimit të kapaciteteve operacionale të zbatimit të ligjit për shkak të pandemisë COVID-19.

Lockdown-et, në lidhje me pandeminë dhe mbylljen e hapësirave publike për tubime masive, të tilla si qendrat tregtare, kishat dhe stadiumet, duket se kanë çuar në një ulje të përdorimit të eksplozivëve në sulmet terroriste.

Në vitin 2020, terroristët kryesisht iu drejtuan thikave, goditjes së automjeteve dhe zjarrvënies.

Armët e zjarrit u përdorën vetëm në sulmin terrorist të krahut të djathtë në Hanau, Gjermani, në shkurt dhe sulmin xhihadist në Vjenë në muajin nëntor.

Radikalizimi në internet

Me rritjen e përdorimit të internetit gjatë pandemisë, komunitetet në internet luajtën një rol të rëndësishëm në përhapjen e ekstremizmit të dhunshëm.

Pas përpjekjeve të aplikacioneve të mesazheve, të tilla si: Telegram, për të bllokuar grupet terroriste, propaganda xhihadiste u shpërnda më shumë në platforma të shumta, shpesh më të vogla në internet, dhe ekstremistët e krahut të djathtë, veçanërisht të rinjtë, përdornin gjithnjë e më shumë video-lojëra dhe platforma lojrash për të përhapur ideologjinë e tyre.

Si ekstremistët xhihadistë, ashtu edhe ata të krahut të djathtë, u përpoqën të shfrytëzonin COVID-19 për qëllime propagandistike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.