Abraham bën thirrje që të respektohen standardet evropiane: Kosova në Këshill të Evropës për stabilitetin e rajonit

Knut Abraham, deputet nga radhët e Unionit Kristian-Demokrat (CDU) në Parlamentin e Gjermanisë, njëherësh anëtar i delegacionit gjerman në Asamblenë Parlamentare të Këshillit të Evropës, nëpërmjet një postimi në platformën “X” të dielen, tha se anëtarësimi i Kosovës në organizatën më të vjetër evropiane është rruga e vetme për stabilitetin e Ballkanit Perëndimor.

Në prag të vendimmarrjes historike në Komitetin e Ministrave për apo kundër pranimit të Kosovës në Këshillin e Evropës, deputeti gjerman u bëri thirrje vendeve anëtare që të votojnë në favor të vendit të vogël ballkanik, sepse sipas tij, nga kjo varet kredibiliteti i Këshillit të Evropës, mbrojtja e të drejtave të pakicave etnike në Kosovë dhe mbi të gjitha, stabiliteti rajonal.

Kosova u mbështet nga shumica dërrmuese e deputetëve në Asamblenë e Parlamentare të Këshillit të Evropës për të kaluar fazën e parafundit drejt anëtarësimit në panteonin e kombeve të barabarta demokratike evropiane. Megjithatë, nuk janë përfaqësuesit e popullit ata që e japin fjalën e fundit kur bëhet fjalë për pranimin e anëtarëve të rinj, por ministrat e jashtëm.

“Komiteti i Ministrave ka dy zgjedhje: Të veprojë në përputhje me vlerat dhe standardet tona duke e pranuar Kosovën në maj. Ose, ta injorojë vlerësimin e detajuar të juristëve të shquar, tri raportuesve, tri komisioneve dhe Asamblesë Parlamentare të Këshillit të Evropës… duke mos marrë asnjë vendim”, nënvizoi Abraham në 75-vjetorin e themelimit të organizatës.

“Kjo [e dyta] do të dërgonte një sinjal të dëmshëm për deputetët dhe qytetarët në rajon: se shtetet mund t’i shpërfillin standardet si të duan. Nga ky vendim varet besueshmëria e institucionit, mbrojtja e të drejtave të pakicave në Kosovë dhe stabiliteti i rajonit. Nëse respektojmë standardet dhe vlerat, atëherë pranimi i Kosovës në maj është e vetmja rrugë përpara”, shtoi ai.

Kosova aplikoi për anëtarësim në Këshill të Evropës në maj të vitit 2022, por moszbatimi i vendimit të Gjykatës Kushtetuese për Manastirin e Deçanit u kthye në pengesë që vendi i vogël ballkanik të vazhdojë rrugëtimin drejt anëtarësimit në organizatë, posaçërisht sepse të drejtat e njeriut dhe sundimi i ligjit janë dy vlerat themelore mbi të cilat bazohet Këshilli i Evropës.

Kjo çështje mori epilog kur Qeveria e Kosovës vendosi në mars t’ia dorëzojë pronësinë e 24 hektarëve tokë Kishës Ortodokse Serbe (KOS). Gjykata Kushtetuese e Kosovës vendosi në favor që manastirit t’i jepej toka në vitin 2016, por qeveritë e njëpasnjëshme kosovare refuzuan ta zbatonin vendimin e gjykatës. E për fatin e Kosovës vendoset në mes të muajit maj.

Today, the CoE celebrates its 75th anniversary.

It was founded to defend human rights based on principles and values.

In April, PACE concluded with a huge majority that 🇽🇰 fulfilled all standards and values to become a member. Will this matter? 1/4 https://t.co/OiAWI5AA04

— Knut Abraham, MdB (@Knut_Abraham) May 5, 2024

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.