Kryetarja e Kuvendit, Lindita Nikolla, ka refuzuar kërkesën e disa deputetëve të Partisë Demokratike për të thirrur Këshillin e Mandateve.
Arsyeja përse mbledhja nuk do të mbahet, është sepse Alqi Bllako ka dorëzuar mandatin e tij të deputetit.
Në këto kushte, shkruhet në deklaratë, çështja për të cilën kërkohet mbledhja e Këshillit të Mandateve “nuk ekziston më” dhe si rrjedhojë, “Kuvendi nuk mund të vazhdojë procedurat për shqyrtimin e kërkesës së SPAK”.
Kërkesa e deputetëve të PD-së
Deputetë të Partisë Demokratike i kanë kërkuar kryetares së Kuvendit, Lindita Nikolla që të mbledhë Këshillin për Rregulloren, Mandatet dhe Imunitetin, megjithëse ajo u anulua pas dorëzimit të mandatit nga deputeti i Partisë Socialiste Alqi Bllako.
“Kërkojmë thirrjen e mbledhjes së Këshillit për Rregulloren, Mandatet dhe Imunitetin, ditën e mërkurë, datë 30.03.2022, ora 18:00 për të shqyrtuar kërkesën e Prokurorisë së Posaçme Kundër Korrupsionit dhe Krimit të Organizuar Tiranë, depozituar në Kuvendin e Shqipërisë me shkresën nr.1274 prot., datë 29.03.2022, për dhënien e autorizimit për arrestimin e deputetit të Kuvendit të Shqipërisë z. Alqi Bllako, së bashku me relacionin përkatës të arsyetuar”, thuhet në kërkesë.
Kërkesa është firmosur nga deputetët Ervin Salianji, Gazment Bardhi, Greda Bardeli, Saimir Korreshi dhe Enkelejd Alibeaj.
Në një konferencë për shtyp, kryetari i komanduar i PD-së, Enkelejd Alibeaj, e ka cilësuar si antikushtetues vendimin e kryetares së Kuvendit për të anuluar mbledhjen e Këshillit të Mandateve.
“Ka vendosur anulimin e mbledhjes së këshillit të mandateve. E çuditshme. E padëgjuar, në shkelje të Kushtetutës, rregullores dhe kompetencave të kryetarit të Kuvendit. Nga momenti që kryetari i Kuvendit thërret këshillin, kompetenca i kalon pikërisht këtij këshilli. I duhet atij të mblidhet dhe të shqyrtojë kërkesën e SPAK-ut”.
Ai ravijëzoi se përfaqësuesit e opozitës kanë kërkuar që mbledhja e Këshillit të Mandateve të zhvillohet, pavarësisht se deputeti Alqi Bllako dorëzoi mandatin.
Më herët, Nikolla anuloi mbledhjen e parë të thirrur për mandatin e Bllakos me të njëjtin arsyetim se ai ka depozituar në Kuvend deklaratën për heqjen dorë nga mandati i deputetit me vullnet të lirë.
“Deputeti Alqi Bllako ka depozituar në Kuvend deklaratën për heqjen dore nga mandati i deputetit me vullnet të lirë dhe për rrjedhojë Kuvendi nuk mund të vazhdojë procedurat për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit për arrestimin e deputetit Alqi Bllako”.
Pasditen e 30 marsit, në zyrat e Kuvendit të Shqipërisë, mbërriti kërkesa e deputetit të Partisë Socialiste, Alqi Bllako, me anë të së cilës ai heq dorë nga mandati i tij, pasi Prokuroria e Posaçme (SPAK) kërkoi autorizimin për arrestimin e tij për çështjen e inceneratorëve.
Në shkresën zyrtare nga Bllako theksohet se, “me vullnet të plotë dorëzoj mandatin parlamentar si deputet i PS-së, referuar kërkesës së SPAK-ut drejtuar Kuvendit dhe urdhrit të Kryetares për mbledhjen e Këshillit për Rregulloren, Mandatet dhe Imunitetet”.
Një ditë më parë, Bllako në një reagim pas kërkesës së SPAK-ut, nëpërmjet një postimi në median sociale Facebook, bëri të ditur se, “unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik”.
Mbi këtë premisë, ai ka parashtruar argumentin se nuk ka arsye që Kuvendi të mblidhet për të diskutuar mbi mandatin e tij.
Kërkesa e SPAK-ut
“Për shtetasin Alqi Bllako, nisur nga fakti që është i zgjedhur deputet në Kuvendin e Republikës së Shqipërisë, Prokuroria e Posaçme bazuar në parashikimet e nenit 73/2 të Kushtetutës së Republikës së Shqipërisë dhe nenit 288/1/2 të Kodit të Procedurës Penale, do t’i paraqesë kërkesë Kuvendit për dhënie të autorizimit për caktimin e masës sigurimit personal ‘arrest në burg’”, lexohet në deklaratën zyrtare për shtyp të SPAK-ut.
Në njoftimin e publikuar nga SPAK lidhur me nëntë urdhër arrestet, hetimet kanë zbuluar se Bllako, në rolin e ish-sekretarit të Përgjithshëm të Mjedisit, ka kryer veprime të kundërligjshme në lidhje me procedurat e shpronësimit të pronës, ku do të ndërtohej Inceneratori i Fierit.
Kjo, në bashkëpunim me ish-ministrin e Mjedisit, Lefter Koka – i arrestuari i pari për Inceneratorët.
Nga hetimet e kryera ka rezultuar sakaq se Bllako ka favorizuar shoqërinë koncesionare “Integrated Technology Waste Treatment Fier” sh.p.k., kundrejt marrjes “në mënyrë të tërthortë të përfitimit të parregullt” në shumën prej 14 milionë e 964 mijë e 900 lekësh.
SPAK ka caktuar masën e sigurimit pasuror “sekuestro preventive” për pasurinë në zotërim të shtetasit E. B., lloji i pasurisë “apartament”, me sipërfaqe 99.48 metër katror, me adresë Tiranë, me vlerë sipas kontratës shitblerjes në shumën 144 mijë e 246 euro, që përmbush vlerën ekuivalente të përfituar në mënyrë të paligjshme nga shtetasi Alqi Bllako në shumën 14 milionë e 964 mijë e 900 lekësh.
Dëshmia
Bllako ka qenë dëshmitar i thirrur në Komisionin Hetimor lidhur me aferën e inceneratorëve.
Në fjalën e tij, ai theksonte se e kishte dhënë deklaratën e tij për rreth pesë orë në SPAK.
Për këtë arsye, Bllako do të shprehej se nuk mund të dëshmonte në Komision, pasi do të ishte nxjerrje sekreti hetimor.
Në SPAK, ai do të pyetej për rolin e tij si ish-sekretar i Përgjithshëm në Ministrinë e Mjedisit.
Kujtojmë që në këtë periudhë janë miratuar edhe lejet për inceneratorët.
Arrestimet
Gjykata e Posaçme e Shkallës së Parë për Korrupsionin dhe Krimin e Organizuar (GJKKO) do të vendoste më herët caktimin e masës “arrest në burg” për shtatë persona.
Mes tyre gjendej dhe ish-ministri i Mjedisit, Lefter Koka, ndaj të cilit është vendosur një tjetër masë sigurie.
Koka dyshohet për kryerjen e veprave penale “Shpërdorimi i detyrës”, në bashkëpunim, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”.
Mes personave të tjerë të arrestuar janë edhe Pëllumb Abeshi, Azem Shatëri, Florjan Muçaj dhe Erjon Murataj.
Ndaj këtyre të fundit dyshohet kryerja e veprës penale “Shpërdorimi i detyrës”, në bashkëpunim.
Ndërsa ndaj biznesmenit Klodian Zoto dhe Arenc Myrtezanit dyshohet kryerja e veprave penale “Korrupsioni aktiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”, kryer në rrethanën cilësuese “në bashkëpunim”.
Ndërkaq, ndaj Sabina Cenamerit dhe Etleva Kondit është caktuar masa e sigurisë “Arrest në shtëpi”.
Ata dyshohen për kryerjen e veprës penale “Shpërdorimi i detyrës”, në bashkëpunim.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
Lajmet kryesore
-
Vizita e Cameron në Tiranë: Fokus emigrantët dhe plani për gjyqësorin
-
Emigrantët, gjysma e BE-së kërkon të ndjekë modelin e Shqipërisë me Italinë
-
Kryeministri sllovak jashtë rrezikut për jetën, por mbetet në terapi intensive
-
Allen pas takimit me Kurtin: Të zbatohen të gjitha marrëveshjet që kanë bërë Kosova dhe Serbia
