Hill për sanksionet ndaj Vulin-it: E kemi vëzhguar me kujdes, s’duam asnjë kontakt me të

Ambasadori i Shteteve të Bashkuara të Amerikës (SHBA) në Serbi, Christopher Hill, ka thënë se shteti që ai përfaqëson i ka “vëzhguar më shumë kujdes” aktivitetet e Drejtorit të Agjencisë së Informacionit të Sigurisë së Serbisë (BIA), Aleksandër Vulin, i cili së fundi u sanksionua nga Departamenti amerikan i Thesarit.

Vëzhgimi që ShBA i ka bërë Vulin-it është edhe arsyeja që është marrë një vendimi i tillë, tregon Hill.

Sanksionet ndaj Vulin-it, pohon diplomati amerikan janë bërë “për të mbrojtur Shtetet e Bashkuara dhe nënkuptojnë se Vulin-it nuk mund t’i jepet vizë amerikane dhe as që mund të lidhë kontrata biznesi në atë vend”.

“Unë jam i vetëdijshëm se shumë njerëz e shohin këtë shumë më gjerësisht dhe më thellë, si marrëdhëniet mes Serbisë dhe Amerikës dhe pyesin se çfarë do të thotë kjo në aspektin e marrëdhënieve mes dy vendeve. Mendimi im personal është se marrëdhëniet mes Serbisë dhe Amerikës janë të mira dhe ne duam që ato të bëhen edhe më të mira”, theksoi Hill, transmetojnë mediat serbe.

Sipas tij, Serbia e ka bërë të qartë se dëshiron të bashkohet me Perëndimin, duke shtuar se deri ku do të shkojë Beogradi në këtë varet nga vetja dhe se Shtetet e Bashkuara duan të ndihmojnë dhe të jenë pjesë e këtij procesi.

“Serbia dëshiron të bashkohet me ne në Perëndim, por ne nuk patëm përshtypjen se zoti Vulin donte të kontribuonte në këtë dhe bazuar në informacionin që dispononim, ne vendosëm sanksione ndaj tij”, shpjegoi Hill.

Ndryshe, Departamenti Amerikan i Thesarit, këtë të martë, ka sanksionuar drejtorin e Agjencisë për Siguri dhe Informacion të Serbisë, Aleksandër Vulin-in.

Futja në listë të zezë të shefit të BIA-s serbe, Aleksandër Vulin, siç njofton Thesari Amerikan, nënvizon vendosmërinë e SHBA-ve për të mbajtur atë përgjegjës për përfshirje në marrëveshje korruptive që çojnë përpara agjendat politike dhe interesat personale të tij në kurriz të paqes dhe stabilitetit në Ballkanin Perëndimor.

Duke arsyetuar vendimin e shpalljes “non-grata” të ministrit serb, Thesari Amerikan në njoftimin për media, mban përgjegjës Vulin-in edhe për aktet e tij korruptive dhe destabilizuese të cilat kanë lehtësuar gjithashtu aktivitetet malinje të Rusisë në rajon.

Aleksandar Vulin, sipas Thesarit Amerikan, ka qenë i implikuar në krimin e organizuar ndërkombëtar, operacione të paligjshme të narkotikëve dhe keqpërdorim të detyrës publike.

“Vulin ka mbajtur një marrëdhënie reciproke të dobishme me tregtarin serb të armëve, Slobodan Tesiç, duke ndihmuar në sigurimin që dërgesat e paligjshme të armëve të Tesiç mund të lëvizin lirshëm nëpër kufijtë e Serbisë”.

“Veprimet e Vulin kanë avancuar korrupsionin brenda institucioneve qeverisëse të Serbisë. Këto akte përfshijnë shfrytëzimin e autoritetit të tij për përfitime personale, duke përfshirë përfshirjen në një rrjet të trafikut të drogës. Ai ka përdorur pozicionet e tij publike për të mbështetur Rusinë, duke lehtësuar aktivitetet keqdashëse të Rusisë që degradojnë sigurinë dhe stabilitetin e Ballkanit Perëndimor dhe duke i ofruar Rusisë një platformë për të çuar më tej ndikimin e saj në rajon”.

“Zyra e Departamentit të Thesarit të SHBA-së për Kontrollin e Pasurive të Huaja po e mban përgjegjës ose bashkëpunëtor Vulin-in, ose i përfshirë në mënyrë të drejtpërdrejtë ose të tërthortë në, korrupsionin në lidhje me Ballkanin Perëndimor, duke përfshirë korrupsionin nga, në emër të, ose të lidhur ndryshe me një qeveri në Ballkanin Perëndimor, ose një zyrtar aktual ose ish-qeveritar në çdo nivel të qeverisjes në Ballkanin Perëndimor, siç është shpërdorimi i aseteve publike, shpronësimi i aseteve private për përfitime personale ose qëllime politike, ose ryshfet”.

Amerika sanksionon shefin e BIA-s, Aleksandër Vulin-in

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.