Hamasi pranon armëpushimin për Gazën, Izraeli jo

Nuk ka akord përfundimtar. Hamasi e ka pranuar një armëpushim të ndërmjetësuar nga Egjipti dhe Katari për Gazën, por Izraeli e ka quajtur “të papranueshëm”, duke e refuzuar atë.

Janë këto zhvillimet e fundit nga Lindja e Mesme, ku fillimisht, drejtpërdrejt nga baza e grupimit militant, u saktësua se janë pranuar kushtet e një armëpushimi, i cili është ndërmjetësuar në ditët e fundit nga pala egjiptiane dhe ajo e Katarit, ku bisedimet janë mbajtur në Kajro.

Fraksioni islamik tha në një deklaratë se shefi i saj, Ismail Haniyeh, kishte informuar kryeministrin e Katarit dhe shefin e inteligjencës së Egjiptit për pranimin e propozimit të tyre.

Hamasi pranon armëpushimin

Ndërsa detajet më të imta ende nuk janë shpallur, duke përfshirë sa do të zgjasë dhe çfarë do të thotë kjo për pengjet që mbahen në Gaza.

Megjithatë, mediat izraelite kanë nisur menjëherë të raportojnë se Benjamin Netanyahu nuk do ta pranojë këtë akord.

Më pas, një zyrtar ushtarak ka thënë në një komunikim radiofonik se kushtet janë të papranueshme, se Hamasi po e bënte të gjithën që të vononte operacionin izraelit në Rafah dhe se detajet ishin të “zbutura” nga marrëveshja fillestare e propozuar.

Mediat izraelite thonë se Netanyahu nuk do ta pranojë armëpushimin

Nga vetë ndërmjetësit e Egjiptit dhe Katarit ndërkaq, nuk ka ende një prononcim lidhur me gjithë dinamikën.

Raundi i fundit i negociatave midis Izraelit dhe Hamasit pati kaluar një ngërç të dielën, pasi ndërmjetësuesit u përpoqën të kapërcenin boshllëqet e mbetura dhe një delegacion i Hamasit u largua nga bisedimet në Kajro.

Ndaj, nuk dihet se çfarë ndryshimesh mund të jenë bërë, që i kanë rikthyer ata në tavolinë dhe kanë rënë dakord.

Për muaj të tërë, negociatat që synonin arritjen e një armëpushimi dhe lirimin e pengjeve kanë bërë pak përparim, por shenjat që të dyja palët po afroheshin më shumë me një marrëveshje u shfaqën javën e kaluar.

Izraeli hoqi dorë nga disa nga kërkesat e tij të mbajtura prej kohësh dhe një zyrtar i lartë i Hamasit tha se, grupi po studionte ofertën e fundit izraelite me një “frymë pozitive”.

Por pengesa gjatë fundjavës bëri që palestinezët që jetonin në kushte të mjerueshme në Gaza nuk do të përjetonin një pushim të afërt dhe familjet e pengjeve të mbajtura nga militantët do të duhej të prisnin më gjatë për lirinë e të dashurve të tyre.

Pengesa kryesore në bisedime ishte kohëzgjatja e një armëpushimi, me Hamasin që kërkonte që ai të ishte i përhershëm dhe kryeministri izraelit, Benjamin Netanyahu, që shprehu hapjen vetëm për një ndalim të përkohshëm të luftimeve.

Hamasi fajësoi Netanyahun për mungesën e përparimit, i cili u zotua sërish ditët e fundit se ushtria izraelite do të pushtojë Rafahun, qytetin më jugor në Rripin e Gazës, me ose pa marrëveshje.

“Ne ishim shumë afër, por mendjengushtësia e Netanyahut ndërpreu një marrëveshje”, tha Mousa Abu Marzouk, një zyrtar i lartë i Hamasit, në një intervistë telefonike.

Netanyahu ka deklaruar prej javësh synimin e tij për të organizuar një ofensivë tokësore me synim në Rafah, ku rreth një milion palestinezë janë strehuar.

Administrata Biden i ka bërë presion Izraelit që të përmbahet nga ndërmarrja e një operacioni të madh në qytet.

Të dielën, Hamasi gjuajti afërsisht 10 raketa nga zona e kalimit kufitar, duke vrarë tre ushtarë pranë vendkalimit Kerem Shalom, sipas ushtrisë izraelite.

Sulmet me raketa nga Hamasi kanë qenë relativisht të rralla muajt e fundit dhe Izraeli tha se ishte përgjigjur me sulme ajrore që synonin vendin e lëshimit.

Dy zyrtarë amerikanë, të cilët folën në kushte anonimiteti, kundërshtuan nocionin se bisedimet ishin në një ngërç, duke sugjeruar se palët po shqyrtonin detajet e propozimeve më të fundit.

Të dielën, Netanyahu tha se nuk do të pajtohej me tërheqjen e plotë të forcave izraelite nga Gaza dhe përfundimin e luftës.

Përkrahja e kërkesave të tilla, tha ai, do të lejonte Hamasin të rivendoste kontrollin mbi Gazën, të rindërtonte aftësitë e tyre ushtarake dhe të kërcënonte komunitetet në të gjithë Izraelin.

Një delegacion izraelit nuk arriti kurrë në Kajro për raundin e fundit të bisedimeve.

Zyrtari izraelit tha se, Izraeli kishte kërkuar një përgjigje me shkrim për propozimin e tij të fundit nga Hamasi përpara se të dërgonte një delegacion, por se grupi nuk e përcolli kurrë një të tillë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.