Abazoviç thotë se nëse ka propagandues serbë që po nxisin protestat në Mal të Zi – “Do të kenë përgjigje adekuate”

Kryetari i Lëvizjes Qytetare URA në Mal të Zi, Dritan Abazoviç, ka deklaruar se nëse propaganduesi serb, Pedrag Leçiç, është angazhuar në qeverinë e Zdravko Krivokapiç, për të nxitur urrejtje dhe ndarje etnike dhe protesta, ai do të merr “përgjigje adekuate”.

Kabineti i Kryeministrit të Malit të Zi, Zdravko Krivokapiç, të hënën mbrëma konfirmoi se themeluesi i lëvizjes “Otpor”, Pedrag Leçiç nga Serbia, është punësuar në Qeverinë e Malit të Zi.

“Duhet të jemi të durueshëm deri më 4 shkurt. Atëherë do të përfundojë për të gjithë ata që duan ta prekin rendin kushtetues, dhe do të kenë përgjigjen adekuate”, deklaroi Dritan Abazoviç.

“Çështja është se a ka njerëz specialistë, që kanë ardhur për të nxitur protesta dhe argumentime me njerëz, përgjigjen do ta kemi”.

Sipas Abazoviç, të gjitha veprimet në tri ditët e fundit të Krivokapiç, kanë qenë “keq-këshilluara”.

Analisti politik i gazetës malazeze “CdM”, Ljubomir Filipoviç, thotë se një gjë e tillë është tregues i qartë se Krivokapiç po luan me strategjinë “all-in”, dhe se me angazhimin e Leçiç në fushatë, ai po përdor paratë e shtetit për interesa partiake.

“Për këtë arsye, operacione speciale tani po nisin në internet dhe në terren. Caku është që të krijohen tensione dhe presione ndaj entiteteve pro-serbe duke e vënë theksin në politika indentitare. Andaj edhe roli i Vesna Bratiç. Problemi është se këta ekstremistë më nuk i besojnë kryeministrit të Demokratëve, sepse i ka tradhtuar shpresat e tyre”, thotë Filipoviç.

“Është e qartë se ekipi nacionalist i opozitës nga Serbia, të udhëhequr nga Mladjan Gjorgjeviç, po grumbullohen rreth kryeministrit”, shprehet ai.

Filipoviç konsideron se nëse Krivokapiç bie nga pushteti edhe ata humbasin.

“Prandaj edhe ditëve në vijim mund të presim gjithçka”, shprehet analisti i CdM.

“Njëra pjesë e tyre po e nxisin Krivokapiçin, tjetra Frontin Demokratik”.

Sipas shkrimeve të mëparshme të mediave serbe, Predrag Leçiç ka qenë përgjegjës për materialet propagandistike në Rezistencën nën kujdesin e shërbimeve sekrete perëndimore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.