Ndryshimet klimatike në Zimbabve detyrojnë vajzat adoleshente të bien pre e prostitucionit

Tawanda, 16 vjeçe, emri i së cilës është ndryshuar për të mbrojtur identitetin e saj, gjendet mes qindra vajzave nga rajonet rurale të Zimbabve që iu bashkuan tregtisë së seksit vitet e fundit.

Menjëherë pas vdekjes së prindërve të saj, ajo la shkollën, pasi gjyshja e saj nuk mund t’i përballonte tarifat.

Pas viteve të thatësirës dhe të korrave të dështuara, Tawanda nuk mund të shihte një të ardhme në fshat, duke e shtyrë atë në moshën 14-vjeçare të zhvendosej në kryeqytetin Harare në kërkim të një jete më të mirë.

“Kam ardhur këtu si kujdestare e fëmijëve. Gjashtë muaj punova si shërbëtore, por nuk ishte fitimprurëse. Kur filloi pandemia e COVID-19, situata u përkeqësua sepse gruaja për të cilën punoja uli pagën time tashmë të pakët. Kështu që e lashë punën”, thotë ajo.

Tawanda nuk donte të kthehej në shtëpi dhe u zhvendos në Epworth, 12 kilometër në lindje të kryeqytetit Harare, ku nisi punën si punonjëse seksi.

Qyteti është i njohur për dhunën, prostitucionin dhe drogën, ndërsa popullsia vazhdon të rritet me persona që migrojnë nga fshati në qytet.

Tawanda dhe vajza të tjera adoleshente mblidhen në një vend të njohur gjerësisht si “përforcuesi”, ku gjendet një kullë e lartë komunikimi.

Gjatë ditës, zona është e qetë, me pak njerëz përreth.

Por, sapo bie nata, është një koshere e aktivitetit. Aty punonjësit e seksit kërkojnë klientët.

Catherine Masunda, themeluesja e Youth 2 Youth, organizatë me bazë në komunitet në Harare, thotë se, ndërsa statistikat mbi numrin e vajzave të reja të përfshira në prostitucion janë të vështira për t’u llogaritur, situata është shqetësuese.

Është thjesht punë

Një tjetër vajzë adoleshente, Chipo, emri i së cilës është ndryshuar gjithashtu për sigurinë e saj, për Al Jazeera-s i tha se tregtia e seksit është e rrezikshme, por ajo nuk ka zgjidhje.

Ndryshe nga e kaluara, mundësitë e punësimit në fermat e zonave rurale po bëhen më të pakta çdo vit për shkak të efekteve të ndryshimeve klimatike.

Chipo kujton shkatërrimet e ndryshimeve klimatike në shtëpinë e saj në fshat.

Efektet më shqetësuese nuk janë thatësirat, por përmbytjet, thotë ajo, të cilat shkatërrojnë të korrat dhe pronat – dhe ndonjëherë rrezikojnë edhe jetë njerëzish.

“Në vitin 2020, vitin që mbarova (shkollën), prisja të mbillja fasule sojë, e cila është një kulturë me më pak punë intensive, në mënyrë që të mund të paguaja tarifat dhe të merrja me qira një dhomë. Shirat erdhën, por u kthyen në përmbytje dhe shkatërruan planin tim”, thotë Çipo.

Me mungesën e punës së mirëpaguar në vend, shumica e banorëve këtu mbijetojnë si shitës ambulantë, shpërndarës droge, apo merren me prostitucion.

Shumë nga vajzat adoleshente kanë rënë pre e klientëve që refuzojnë t’i paguajnë për shërbimet e ofruara, madje disa herë janë abuzuar seksualisht ose sulmuar.

Në Zimbabve është vepër penale të kërkosh për seks, gjë që e bën të vështirë për gratë e reja të raportojnë keqbërjen ndaj tyre në polici.

Tregti e rrezikshme

Shumica e zonave në Zimbabve janë goditur rëndë nga ndryshimet klimatike me valë të nxehti, reshje të pakta ose shi të tepruar që rezulton në përmbytje të shpejta.

David Marekera, kreu i fshatit në Maramba në provincën Lindore Mashonaland, 130 kilometër në jug të Harare, tha se ndryshimi i klimës nuk po sjell vetëm uri në komunitet, por po shkatërron të ardhmen e fëmijëve.

“Është për të ardhur keq. Për ne, dëmi është kolosal dhe i pakthyeshëm të paktën tani për tani. Djem adoleshentë po braktisin shkollën, duke shkuar në miniera artizanale në digën Mazowe. Vajzat adoleshente bien pre e prostitucionit, për shkak të urisë”, thotë Marekera.

Strategjia Kombëtare e Reagimit ndaj Ndryshimeve Klimatike të Zimbabvesë thotë se ndryshimi i klimës është “kërcënimi më i madh për njerëzimin sot”.

Braktisja e shkollës

Onita Sibanda, 15 vjeçe, nga distrikti Hwange në veriperëndim të Zimbabve, thotë se shumica e vajzave të moshës së saj u zhvendosën në zonat urbane për t’u shpëtuar efekteve të ndryshimeve klimatike.

“Është e vështirë të përcaktosh sasinë e numrave që vërshojnë nga fshatrat e Hwange-s. Por fushat tona nuk kanë prodhuar mjaftueshëm vitet e fundit”, tha ajo për Al Jazeera.

“Përgjithësisht moti është i keq. Këtu në Hwange, ne po përjetojmë përmbytje dhe stuhi pothuajse çdo vit për tri vitet e fundit. Vajzat braktisin shkollën dhe shkojnë në qytet për të kërkuar punë, por më vonë i drejtohen prostitucionit”, thotë Onita.

Daniel Sithole, analist klimatik dhe drejtor i Green Shango Trust, organizatë jofitimprurëse që fokusohet në zbutjen e ndryshimeve klimatike, thotë se gratë e Zimbabvesë janë ato më të prekurat nga ngrohja globale.

“Gratë janë në mënyrë disproporcionale të ndjeshme ndaj efekteve të ndryshimeve klimatike, të cilat, nga ana tjetër, mund të përkeqësojnë pabarazitë ekzistuese gjinore”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.