Kurti: Për Strategjinë e Sigurisë jemi konsultuar edhe me ambasadorët e QUINT-it

Kryeministri i Kosovës, Albin Kurti, ka paraqitur në Kuvendin e Kosovës propozimin për strategjinë e sigurisë së Kosovë për vitin 2022-2027.

Kryeministri, bëri të ditur se për këtë dokument është diskutuar edhe me vendet e QUINT-it.

”Ky dokument paraqet objektive strategjike që lidhet me elemente jetike për Kosovën“.

Ndërkaq, përmes fjalimit të tij theksoi se synimi strategjik i Kosovës për siguri mbetet anëtarësimi në NATO.

“Gjatë qeverisjes sonë i kemi dhënë vëmendje të veçantë institucioneve të sigurisë me politika të qarta dhe veprime konkrete karshi tyre. E kemi rritur buxhetin e Forcës së Sigurisë së Kosovës për 52 për qind, nga 63 milionë sa ishte në vitin e kaluar në rreth 102 milionë për vitin 2022”.

“Qeveria jonë ka ndarë buxhetin më të lartë në Forcën e Sigurisë së Kosovës, duke e përafruar atë si shifër dhe duke e synuar natyrisht kriterin e vendeve të NATO-s, prej 2 për qind të brutot produktit vendor”, deklaroi Kurti.

Sipas kreut të ekzekutivit, me këtë buxhet është treguar seriozitet nga qeveria për sigurinë në vend.

Kurti, shtoi se do të angazhohen edhe më shumë në “ngritjen e kapaciteteve”.

Teksa, ka përmendur edhe Fondin e Sigurisë përmes të cilit janë përshpejtuar disa procese në këtë drejtim.

“Nga foltorja, do të dëshiroja të falënderoja secilin që ka kontribuar në fondin e Sigurisë. Krahas rritjes së buxhetit për FSK-në dhe krijimin të fondit e sigurisë, kemi përshpejtuar blerjet ushtarake dhe blerjet e tjera që lidhen me fuqizimin e kapaciteteve tona të mbrojtjes dhe sigurisë, kemi krijuar linja të reja të furnizimit me sisteme të armatimit në mënyrë të drejtpërdrejt shtet me shtet duke shkurtuar kohën e furnizimit dhe duke ulur ndjeshëm koston financiare”.

Kurti, bëri thirrje për miratimin e strategjisë së sigurisë së Kosovës, pasi konsideron se bëhet unifikimi i politikave dhe qëndrimeve në siguri.

“Miratimi i strategjisë së sigurisë së Kosovës, u jep drejtim institucioneve tona në përpjekjet për unifikimin e politikave dhe qëndrimeve të cilat ndërlidhen me interesat shtetërore të sigurisë dhe për të ndërtuar një të ardhme të sigurt e në paqe. Ashtu siç ka ditur që të çlirohet, e të pavarësohet Kosova ajo do të dijë edhe të do të rrijë vertikalisht si Republikë e Pavarur dhe Demokratike”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.