Turqia ndjek përpjekjet ndërmjetësuese për bisedimet e paqes Rusi-Ukrainë

Presidenti turk Recep Tayyip Erdoğan ka bërë të ditur synimet e vazhdueshme për të lehtësuar bisedimet e paqes midis Rusisë dhe Ukrainës.

Kjo, vjen si një përpjekje diplomatike që synon të zbusë tensionet në rajon.

“Ne folëm për këtë në detaje gjatë vizitës së presidentit ukrainas Volodymyr Zelensky në Turqi dhe gjatë takimeve që mbajtëm në samitin e liderëve të NATO-s”, ka thënë Erdogan.

“Shpresoj se do të marrim rezultate pasi të dy liderët të shkojnë së bashku me ne për ndërmjetësim”, ka shtuar ai.

Sakaq, vërejtjet e tij pasojnë sukseset e mëparshme ndërmjetësuese të Turqisë, duke përfshirë ndërmjetësimin e marrëveshjes kritike të grurit midis Rusisë dhe Ukrainës në korrik 2022.

Megjithatë, marrëveshja hasi në një pengesë kur Rusia u tërhoq prej saj më 17 korrik të këtij viti, duke përmendur detyrimet e paplotësuara nga pala ukrainase.

Ndërkohë, Erdogan ka mbetur optimist për rivendosjen e marrëveshjes.

“I gjithë qëllimi ynë këtu është të mbajmë qëndrimin pozitiv të Rusisë për çështjen e korridorit të grurit përmes bisedave tona telefonike me Putin-in”, ka thënë ai.

Një bisedë telefonike e fundit mes Erdogan-it dhe Putin-it në fillim të gushtit nënvizoi pasojat negative që rrjedhin nga pezullimi i marrëveshjes së grurit.

Erdogan u zotua se Turqia do të vazhdojë me “përpjekje intensive” dhe diplomaci për të rivendosur marrëveshjen, duke e lavdëruar marrëveshjen si “urë për paqen” dhe duke mbrojtur për rivendosjen e saj si një masë për ruajtjen e stabilitetit në rajon.

“Nëse gjejmë mundësinë në orarin e ngjeshur, do të takohemi dhe do të flasim ballë për ballë me Putin-in”, ka shtuar Erdogan.

Po ashtu ai ka lënë të nënkuptohet për potencialin e ministrit të Jashtëm turk Hakan Fidan për të bërë një udhëtim në Rusi në një përpjekje për të çuar përpara negociatat ballë për ballë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.