Sarah Ferguson diagnostikohet me kancer të lëkurës, pak javë pasi njoftoi se e “mundi” kancerin e gjirit

Dukesha e Jorkut, Sarah Ferguson po ndeshet sërish me probleme shëndetësore, kësaj radhe ajo është diagnostikuar me kancer të lëkurës.

Kështu zbuloi një deklaratë e dhënë për People, transmeton AlbanianPost, ku një përfaqësuese e Dukeshës së Jorkut, 64 vjeçe, e konfirmoi përditësimin më të ri në jetën e Ferguson.

“Pas diagnostikimit të saj me një formë të hershme të kancerit të gjirit këtë verë, Sarah, Dukesha e Jorkut tani është diagnostikuar me melanoma malinje”, tha ajo.

Sipas zëdhënëses, Dukeshës së Jorkut iu hoqën disa nishane dhe u analizuan nga një dermatolog ndërsa po i nënshtrohej një operacioni rindërtues pas mastektomisë së saj, dhe një nga nishanet u identifikua si kancerogjene.

“Dukesha dëshiron të falënderojë të gjithë ekipin mjekësor që e ka mbështetur, veçanërisht dermatologun e saj, vigjilenca e të cilit siguroi që sëmundja të zbulohej në kohë”, tha përfaqësuesja.

“Ajo beson se përvoja e saj nënvizon rëndësinë e kontrollit të madhësisë, formës, ngjyrës dhe strukturës dhe shfaqjes së nishaneve të reja që mund të jenë një shenjë e melanomës”, shtoi ajo.

Dukesha po merr trajtim për melanomën e saj në Londër dhe ka marrë kohë për t’u rikuperuar në klinikën ‘Mayrlife’, një vendpushim shëndetësor mjekësor në Austri.

“Ajo po i nënshtrohet hetimeve të mëtejshme për të siguruar që kjo është kapur në fazat e hershme”, shpjegon përfaqësuesja e saj.

“Është e qartë se një tjetër diagnozë kaq shpejt pas trajtimit për kancerin e gjirit ka qenë shqetësuese, por Dukesha mbetet në humor të mirë”, tha ajo tutje.

Vajza e madhe e Fergie, Princesha Beatrice, ka një lidhje me diagnozën e fundit të kancerit të nënës së saj, pasi ajo është një mbrojtëse e Fondacionit Britanik të Lëkurës dhe ka punuar më parë me pacientë me kancer të lëkurës.

Nëntorin e kaluar, Dukesha rrëfeu se të dyja “vajzat e saj të mrekullueshme”, Beatrice dhe Princesha Eugenie, e mbështetën atë gjatë gjithë rrugëtimit të saj për kancerin e gjirit.

Fergie u diagnostikua për herë të parë me një formë të hershme të kancerit të gjirit qershorin e kaluar.

Më pas Fergie zbuloi se ajo “mundi kancerin e gjirit” në një mesazh të Vitit të Ri të shpërndarë në mediat sociale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.