Disa “mollë të kalbura” apo sistem korruptiv, çfarë dihet për “Qatargate”

Deri ku do të çojë skandali i Qatargate, i cili kulmoi me arrestimin e zëvendës presidentes së Parlamentit Evropian, Eva Kaili (tashmë e shkarkuar) dhe ish-deputetit italian, Antonio Panzeri?

A është zbulimi nga prokurori federal në Bruksel një rast keqpërdorimi që përfshin disa “mollë të kalbura” apo është pjesë e një sistemi shumë më të gjerë korrupsioni?

Kryetarja e Parlamentit Evropian, Roberta Metsola tha se institucioni i komunitetit “është i sulmuar” duke lënë të kuptohet se çështja nuk është e destinuar të përfundojë me largimin e të dyshuarve.

Për më tepër, Eurodhoma dhe komisioni “rrethohen” nga një ushtri lobistësh (regjistri zyrtar ka mbi 13 mijë) të cilët investojnë dhjetëra milionë euro çdo vit për të ndikuar në vendimet e Brukselit.

Ja çfarë dimë deri tani dhe çfarë sugjeron se puna e gjyqësorit sapo ka filluar.

Prokurori federal Michel Claise në korrik 2022 hapi një hetim mbi ndikimin e Katarit në BE për të “pastruar” imazhin e tij në drejtim të të drejtave të njeriut në funksion të Kupës së Botës të futbollit.

Më 9 dhjetor, u morën në pyetje ish-deputeti italian Antonio Panzeri, Niccolò Figà-Talamanca sekretar i OJQ-së “Nuk ka paqe pa drejtësi”, nënkryetarja greke e Parlamentit Evropian Eva Kaili dhe asistenti parlamentar, Francesco Giorgi.

Giorgi tashmë prej orësh i është përgjigjur pyetjeve të hetuesve, të cilat mund të paralajmërojnë një zgjerim të hetimeve.

Luca Visentini, kreu i Ituc, një shoqatë sindikale ndërkombëtare, u arrestua dhe më pas u lirua.

Në Itali, gruaja dhe vajza e Panzeri-t u goditën nga një urdhër arresti evropian.

Për të gjithë, akuza është për korrupsion për marrjen e ryshfeteve nga qeveria e Katarit.

Janë bastisur gjithsej 19 shtëpi dhe 10 zyra parlamentare në Bruksel.

Kontrollet kishin të bënin edhe me eurodeputetët belgë Marc Tarabella dhe Maria Arena.

I gjithë skandali preku anëtarët e grupit të socialistëve dhe demokratëve.

Edhe deputetët Andrea Cozzolino dhe Pietro Bartolo (jo nën hetim) u pezulluan.

Gjatë kontrollit u sekuestruan shuma të mëdha parash.

Eva Kaili-t iu gjetën rreth 750 mijë euro cash (shumë në një valixhe që i ati po përpiqej t’i nxirrte nga Brukseli).

Antonio Panzeri në vend të kësaj mbajti 600 mijë euro para në një kasafortë në Bruksel; 17 mijë euro të tjera në kartëmonedha u gjetën në shtëpinë e familjes në Calusco d’Adda (Bergamo).

Me kalimin e orëve, pozicioni i Margharitis Schinas, komisionerit dhe zëvendësit të Ursula von der Leyen, po bëhet i turpshëm (nga pikëpamja politike).

Politikani grek, një anëtar i partisë së qendrës së djathtë “Nea Demokratia” ka lavdëruar vazhdimisht publikisht Katarin, duke theksuar “progresin e tij në të drejtat e punës dhe përpjekjet për të siguruar përfshirjen dhe tolerancën”.

Ishte lideri socialist Manon Aubry që denoncoi publikisht qëndrimin e butë të treguar nga Schinas ndaj emirëve të Gjirit.

Fjalë jo shumë të ndryshme nga ato që tha Eva Kaili.

Në një konferencë për shtyp të hënën, von der Leyen refuzoi t’u përgjigjej pyetjeve në lidhje me zëvendësin e saj.

“Nga Katari kam marrë vetëm një top dhe një kuti me çokollata”, tha Schinas nga ana e tij. “Pas 32 vitesh politikë, karriera ime është e qartë”.

Raphael Glucksmann, eurodeputeti francez i grupit socialist dhe demokrat, kryeson komisionin special për ndërhyrjet e huaja në Strasburg.

“Që kur e kam kryesuar atë, kam paralajmëruar vazhdimisht se korrupsioni dhe depërtimi i interesave të huaja kanë të bëjnë me të gjitha vendet evropiane dhe të gjitha partitë politike. Në të djathtë dhe në të majtë”, deklaroi ai menjëherë pas shpërthimit të Qatargate.

Sipas tij, fakti që e djathta ekstreme evropiane u financua nga Putin është e njohur për pothuajse të gjithë, por nuk është i vetmi rast.

“Duhet të kemi guximin të nxjerrim në dritë të gjitha rastet e depërtimit dhe korrupsionit”, shtoi ai.

Glucksmann njoftoi se përpjekjet e komisionit të tij tani do të përqendrohen në ndikimin e ushtruar nga Doha.

Në shtator, Olaf (zyra kundër mashtrimit e Komisionit Evropian) hapi një hetim mbi presionin e ushtruar ndaj institucioneve të BE-së nga Uber.

Në veçanti, roli i luajtur nga ish-komisionerja evropiane Neelie Kroes është nën vëzhgim. Drejtuesit e Olaf i kërkuan kësaj të fundit sqarime.

Hetimi lindi falë informacionit të transmetuar në shtyp nga një “sinjalizues” brenda godinave të Brukselit.

Rasti Uber konsiderohet emblematik i konflikteve të interesit që lindin shumë shpesh midis lobeve ekonomike dhe ish-politikanëve që shkojnë drejtpërdrejt në shërbim të këtyre të fundit.

Marrë dhe përshtatur nga Corriere della Sera për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.