Aksioni në Veri, Vuçeviç: Për shkak të dështimit në KiE, Kurti po kërcënon mbijetesën e serbëve

Kryeministër i Serbisë, Millosh Vuçeviç, ka reaguar pasi janë mbyllur gjashtë degë të Bankës Postare të Kursimeve të Serbisë në Veri për shkak të dyshimit se kanë zhvilluar veprimtari të kundërligjshme.

“I dëshpëruar për shkak të dështimit për t’u anëtarësuar në Këshillin e Evropës, Albin Kurti ka vendosur për një akt të ri egërsie që kërcënon drejtpërdrejt mbijetesën e popullit serb në Kosovë”, ka shkruar ai në rrjetin e tij social Instagram.

“Pse serbët e Kosovës janë komuniteti i vetëm në Evropë që nuk mund të bëjë biznes normalisht? A kanë serbët e Kosovës të drejtë në paga dhe pensione?”, ka pyetur ai.

“Këto nuk janë pyetje për ekstremistin Kurti. Ne e dimë qëndrimin e tij. Këto janë pyetje për komunitetin ndërkombëtar, i cili nuk reagon ndaj veprimeve të Kurtit për një kohë të gjatë”, shtoi.

Ndërkaq drejtori i të ashtuquajturës Zyrë për Kosovën në Qeverinë e Serbisë, Petar Petkoviç, ka thënë se vendosja e Policisë së Kosovës në degët e Bankës Postare të Kursimeve, është ‘një akt tjetër i dhunshëm i shfuqizimit të institucioneve serbe në veri dhe i dëbimit të popullit serb’.

“Sipas urdhrit personal të Albin Kurtit, në ora 15:15 policia ka bastisur të gjitha degët e Bankës së Kursimeve Postare dhe Departamentit të Thesarit në të katër komunat në veri të Kosovës. Kurti ka pritur që të kalojë dialogu dhe duket se dështimi i përjetuar në lidhje me anëtarësimin e Kosovës në Këshillin e Evropës, zgjati një lëvizje të re të njëanshme që synonte të shkaktonte trazira dhe kaos”, theksoi ai.

Petkoviç shtoi se ”është e qartë se ”piromani ballkanas Albin Kurti” dëshiron luftë dhe vuajtje të popullit serb, sepse gjithçka që ka bërë në muajt e fundit, po e bën ekskluzivisht për hir të dëbimit të serbëve nga territori i Kosovës”.

“Tani është e qartë se ata gjatë gjithë kohës kanë simuluar praninë dhe pjesëmarrjen e tyre në dialog, sepse prisnin të shpërbleheshin në Këshillin e Evropës. Dhe, meqë dështuan, është e qartë se qëllimi kryesor dhe vendimi për shfuqizimin e dinarit, nuk është vetëm ndalimi i pagave, pensioneve, përfitimeve sociale, heqja e shpenzimeve materiale për institucionet tona serbe në Kosovë si spitalet, shkollat ​​dhe kopshtet”, ka pretenduar Petkoviç.

Ai ka paralajmëruar se do të bisedojë me të dërguarin e BE-së për dialog, Miroslav Lajçak, dhe se do të ftojë edhe përfaqësuesit e QUINT-it dhe do t’i informojë të gjithë në skenën ndërkombëtare për paligjshmërinë dhe “terrorin e Kurtit”.

“Ky nuk është një veprim i ri, vetëm kaq, në përshkallëzim. Është një sulm i dhunshëm ndaj vetë dialogut, sepse çështja e dinarëve dhe zgjidhja e fatit të Postës është bërë pjesë integrale e dialogut. Por Kurti e shkatërron atë sepse ai nuk i përgjigjet asaj”, potencoi ai.

Mbyllen 6 degë të Bankës Postare të Kursimeve të Serbisë në Veri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.