Kurti lavdërohet me punën në shëndetësi: Para tre vitësh pacientët kanë paguar 80%, tash shteti ua përgjysmon pagesat

Kryeministri i Kosovës Albin Kurti, gjatë pjesëmarrjes në përurimin e renovimit të Klinikës së Onkologjisë, ka lavdëruar punën e tij në sektorin e shëndetësisë, duke bërë  krahasimin me qeverisjet e kaluara.

Sipas tij, tashmë shteti mbulon gjysmën e shpenzimeve për pacientët që diagnostikohen me sëmundjen e kancerit.

“Në përgjithësi në Kosovë, qytetarët e Republikës që bëhen pacientë blejnë rreth 120 milionë euro barna. Kjo i bie që gjysmën e kësaj kosto e paguan shteti, e gjysmën pacientët. Ndërsa, para tri vite pacientët e kanë paguar 80%, e shteti 20%”.

“Lista e Barnave Esenciale, është zgjeruar dhe meqë rast mësova se kjo është ndihma më e madhe që paraprakisht është bërë për shkak se barnat janë të shtrenjta dhe buxheti është shtuar prej 8 milionë në 13 milionë euro”, ka deklaruar ai.

Kurti, ka përmendur edhe investimet që janë bërë në këtë klinikë, duke sqaruar se afati për përfundimin e punimeve në këtë klinikë ishte muaji korrik.

“Kemi një investim substancial prej 600 mijë euro, që e ka transferuar në mënyrë shumë domethënëse për stafin mjekësor, por para së gjithash dhe mbi të gjitha për pacientët këtë klinikë aq të nevojshme dhe të rëndësishme”.

Teksa ka theksuar se rritje do të ketë edhe në numrin e shtretërve.

“I kanë pasur 45 shtretër, tash i kanë 60 shtretër dhe së shpejti do të jenë 110 shtretër. Përveç kësaj me akselatorin e ri të cilin e kemi instaluar lista e pritjes është zero, pra nuk ka pritje dhe ky akselator pati kushtuar 1 milionë 444 mijë euro”.

Ministri i Shëndetësisë, Arben Vitia, në fjalimin e tij ka pohuar së shërbimet që pacientët do të marrin do të jenë më të mira sesa asnjëherë më parë.

“Shumë i lumtur dhe shumë i gëzuar që në këtë klinikë tashmë pacientët do të marrin shërbime shumë më cilësore, me shumë barna, pa listë të pritjes në radioterapi dhe në kushte të cilat i pamë, në kushte jashtëzakonisht të mira dhe dinjitoze”.

Klinika e Onkologjisë në Prishtinë është e vetmja qendër në Kosovë ku të prekurit me kancer marrin kimioterapinë apo trajtime të tjera.

Nga kjo sëmundje në Kosovë regjistrohen çdo vit pothuajse 1 mijë e 500 raste të reja.

Në këtë klinikë brenda 24 orësh, shërbime marrin rreth 400 pacientë, që vijnë nga qytete të ndryshme të Kosovës.

Klinika e Onkologjisë i ka rreth 60 shtretër dhe vazhdimisht ballafaqohet me mungesë të barnave.

Sipas Organizatës Botërore të Shëndetësisë, kanceri është ndër shkaqet kryesore të vdekjeve në mbarë botën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.