Deputetja e AAK-së, Time Kadrijaj, dëshmitare në gjyqin kundër komandant “Ujkut” në Hagë

Deputetja e Aleancës për Ardhmërinë e Kosovës (AAK), Time Kadrijaj, do të dëshmojë në procesin gjyqësor ndaj ish-eprorit të Ushtrisë Çlirimtare të Kosovës (UÇK), Pjetër Shala, gjërësisht i njohur me nofkën komandant “Ujku”, i cili po akuzohet për krime të pretenduara lufte nga Dhomat e Specializuara të Kosovës në Hagë të Holandës.

Gjatë marrjes në pyetje nga mbrojtja e ekipit mbrojtës të Shalës, ajo është pyetur edhe për disa persona, duke përfshirë kryetarin e AAK-së dhe ish-komandantin e UÇK-së, Ramush Haradinaj, për të cilin ka thënë se ka qenë ushtar i dalluar në luftë dhe se nuk ka qenë kurrë në Shqipëri.

Ajo është pyetur edhe për ish-deputeten kosovare, Safete Hadergjonaj dhe ish-luftëtarët e UÇK-së, Daut e Agron Haradinaj dhe Shaip Musaj. Kadrijaj ka thënë se ajo ka qëndruar në fshatin e saj të lindjes dhe se ka shërbyer aty, derisa ka shtuar se në Koshare ka filluar dhe përfunduar misionin e saj.

Zyra e Prokurorit të Specializuar (ZPS) ka ngritur katër akuza për krime lufte ndaj Shalës, përfshirë akuza për torturë dhe vrasje. ZPS-ja ka pretenduar se Shala ka qenë pjesë e një “grupi kriminal” që ka arrestuar dhe ka keqtrajtuar të paktën 18 persona, të cilët konsideroheshin kolaboracionistë.