Qeveria me masa të reja lehtësuese

Në mbledhjen e Qeverisë së Kosovës me shumicë të votave janë miratuar masat e reja anti-COVID-19. Masat e reja lehtësuese do të hynë në fuqi nga data 31 maj.

Gjatë mbledhjes së të premtes u mor vendim se do të largohet ora policore dhe do të zgjatet orari në gastronomi dhe do të hiqen maskat gjatë ecjes kur janë vetëm në ambientin e jashtëm.

Kështu ka bërë të ditur gjatë mbledhjes së Qeverisë së Kosovës, ministri i Shëndetësisë, Arben Vitia.

“Sipas raportit të IKShPK-së situatat epidemiologjike në Kosovë paraqitet e qëndrueshme me vazhdimin e uljes së rasteve pozitive, duke shënuar rënie. Qeveria cakton masa më të lehtësuara”, tha ai.

Ministri Vitia ka thënë se maskat gjatë ecjes të vetëm nëpër rrugë do të largohen.

“Masat kryesore do të jenë si në vijim: Kufizimi i qarkullimit do të hiqet, megjithatë nga ora 00:00 deri në ora 05:00 nuk lejohet grumbullimi i personave në hapësira të brendshme dhe të jashtme. Zgjatja e orarit të punës së gastronomisë do të jetë deri në orën 23:00. Lejimin e lëvizjes pa maska të qytetarëve gjatë ecjes kur ata janë vet dhe në ambientet e jashtme”, u shpreh Vitia.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.