Deputeti i vetëm shqiptar në Parlamentin e Serbisë, Shaip Kamberi, është takuar këtë të shtune me Kryeministrin e Kosovës, Albin Kurti, të cilin e ka falënderuar për “vëmendjen e shtuar” të Kosovës ndaj shqiptarëve që jetojnë në Luginë.
“E falënderova Qeverinë e Kosovës për vazhdimin e përkrahjes së filloristëve duke ia siguruar tekstet shkollore pa pagesë dhe për vëmendjen e shtuar të Kosovës ndaj shqiptarëve të Luginës’, ka shkruar Kamberi në Facebook.
Ai ka treguar se kreun e ekzekutivit kosovar e ka njoftuar me zhvillimet e fundit në Luginë të Preshevës dhe me angazhimin e përpjekjet parlamentare për avancimin e pozitës së shqiptarëve.
“E informova se bashkë me deputetët boshnjak të SDA kemi iniciuar pesë projektligje, ndër të cilat ai për mbrojtjen e të drejtave dhe lirive të pakicave; për selitë dhe territorin e gjykatave”.
Përveç këtij, është edhe ajo “për ndryshimin e ligjit për përdorimin e simboleve kombëtare”.
“Për ndryshimin e Rregullores së parlamentit ashtu që listat e pakicave të kenë mundësinë e krijimit të grupit parlamentar me tre deputet e jo me pesë siç kërkohet për partitë qendrore, si dhe projektrezolutën për Srebrenicën”, shtoi.
Shqiptarët që jetojnë në Luginë të Preshevës janë të shtypur sistematikisht nga institucionet e Serbisë.
Madje, atyre nuk iu lejohet as përdorimi i flamurit kombëtar.
Së fundmi një nga çështjet që është ngritur edhe në Senatin amerikan është pasivizimi i adresave që Serbia po i bënë shqiptarëve atje, posaçërisht në Medvegjë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
