Aktori John Schneider bën thirrje për varjen publike të Joe Biden

Aktori John Schneider bëri thirrje për ekzekutimin e presidentit amerikan Joe Biden dhe djalit të tij, Hunter, në një postim të fshirë në mediat sociale që tërhoqi reagime nëse ai duhet të akuzohet penalisht.

Schneider e hodhi postimin në platformën X në orën 02:00 të mëngjesit me kohën lokale të enjten.

“President, unë besoj se ju jeni fajtor për tradhti dhe duhet të vareni publikisht. Edhe djali juaj. Përgjigja juaj është..? Sinqerisht, John Schneider”, thuhej në postim.

Komenti ishte një përgjigje ndaj një postimi nga Biden që thoshte se ish-presidenti Donald Trump – i cili po përballet me më shumë se 90 akuza penale teksa kërkon një presidencë të dytë në vitin 2024 – “paraqet shumë kërcënime për vendin tonë”.

“Por kërcënimi më i madh që ai paraqet është për demokracinë tonë. Nëse e humbim atë, ne humbim gjithçka”, vijonte postimi i Biden-it.

Përgjigja e Schneider-it ndaj postimit të Biden-it tërhoqi mijëra përgjigje përpara se të fshihej.

Më vonë është raportuar se Shërbimi Sekret – agjencia e ngarkuar me mbrojtjen e presidentëve dhe familjeve të tyre – kishte hapur një hetim paraprak për Schneider.

Komentuesit kanë thënë se vërejtja e Schneider-it nuk përbënte një kërcënim me vdekje.

Sipas ligjit federal, kërcënimi “për t’i shkaktuar dëme trupore presidentit të Shteteve të Bashkuara të Amerikës” mund të sjellë gjobë dhe deri në pesë vjet burg.

​ Në një deklaratë, Schneider mohoi të mbështeste ekzekutimin e Biden.

“Unë absolutisht nuk kam bërë thirrje për një akt dhune apo kërcënim si president i SHBA-ve”, thuhej pjesërisht në deklaratën e Schneider.

“Është pozicioni im, të cilin kam të drejtë ta kem, se disa nga udhëheqësit e kombeve tona në Washington kanë humbur rrugën e tyre dhe korrupsioni është i shfrenuar, si në kufijtë e kombit tonë ashtu edhe jashtë saj. Transparenca dhe llogaridhënia duhet të ndodhë në mënyrë që republika jonë kushtetuese të mbijetojë. Nuk ka asnjë kërcënim të nënkuptuar apo ndryshe në atë deklaratë”.

Komentet e Schneider për presidentin erdhën pasi konservatorët dhe mediat që janë miqësore me ta mbështesin përpjekjet republikane për të mbajtur një votim zyrtar për të nisur një hetim për shkarkimin e Biden-it.

Republikanët kanë shpenzuar muaj duke hetuar marrëdhëniet e biznesit të Biden dhe djalit të tij Hunter me shpresën për të gjetur gabime që mund të formojnë bazën për një shkarkim.

Por disa republikanë kanë qenë të zëshëm për shqetësimet e tyre se hetuesit nuk kanë gjetur sjellje të pahijshme nga presidenti, djali i të cilit po përballet me akuza tatimore federale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.