Pse Rusia grabiti eshtrat e Potemkinit nga Ukraina?

Me forcat ukrainase që po godasin qytetin e pushtuar të Khersonit, sundimtarët kukulla të Kremlinit dërguan një ekip në një katedrale të shekullit të XVIII-të, me një mision special.

Kjo, për të vjedhur eshtrat e princit Grigory Aleksandrovich Potemkin.

Kujtimi i pushtuesit të shekullit të XVIII-të është i gjallë për ata në Kremlin, të prirur për rivendosjen e Perandorisë ruse.

Ishte Potemkin ai që e bindi të dashurën e tij, Katerinën e Madhe, të aneksonte Krimenë në 1783.

Themeluesi i Khersonit dhe Odesës, ai kërkoi krijimin e një “Rusie të Re”, një dominim që shtrihej në atë që tani është Ukraina jugore përgjatë Detit të Zi.

Kur presidenti, Vladimir Putin, pushtoi Ukrainën në shkurt me synimin për të rivendosur një pjesë të një Perandorie të humbur prej kohësh, ai thirri vizionin e Potemkinit.

Tani, me ushtrinë e Putin-it që ka dështuar në marshimin e saj drejt Odesës dhe kërcënuar me largim nga Khersoni, planet e tij të mëdha janë në rrezik.

Por mes besnikëve të Kremlinit, besimi në atë që ata e shohin si perandoria e ligjshme e Rusisë është ende i thellë.

Kështu ndodhi dhe një ekip zbriti poshtë një guri varri të vetmuar prej mermeri të bardhë.

Për të arritur në eshtrat e Potemkinit, ata hapën një derë kurth në dysheme dhe u ngjitën në një vendkalim të ngushtë.

Atje gjetën arkivol të thjeshtë prej druri në një mur të ngritur, të shënuar me një kryq të vetëm.

Nën kapakun e arkivolit, një çantë e vogël e zezë mbante kafkën dhe kockat e Potemkinit, të numëruara me kujdes.

Përfaqësuesit e Kremlinit nuk kanë bërë asnjë përpjekje për të fshehur vjedhjen – përkundrazi.

Kreu i rajonit Kherson, i emëruar nga Rusia, Vladimir Saldo, tha se eshtrat e Potemkinit u morën nga qyteti, në bregun perëndimor të lumit Dnipro, ndërsa trupat ukrainase po afroheshin më shumë.

“Ne transportuam në bregun e majtë eshtrat e princit të shenjtë që ishin në Katedralen e Shën Katerinës”, tha Saldo në një intervistë të transmetuar në televizionin rus.

Aktivistët lokalë ukrainas konfirmuan se Kisha ishte plaçkitur dhe se, së bashku me eshtrat, statujat e heronjve të nderuar rusë ishin hequr.

Sipas historianit Simon Sebag Montefiore, autor i librit “Katerina e Madhe dhe Potemkini”, ishte hera e nëntë që paqja e qetë e Potemkinit ndërpritet.

Montefiore tha në një intervistë se menjëherë pas botimit të librit të tij në vitin 2000, Kremlini e kontaktoi atë për të thënë se sa shumë Putini e admironte punën e tij.

Por ai tha këtë javë se leximi i historisë nga Putini ishte thellësisht i mangët dhe se lufta e tij i ka kthyer në gërmadha qytetet ukrainase si Mariupol dhe Mykolaiv.

Qytete që Potemkin dhe imperialistët e hershëm rusë ndihmuan në ndërtimin e tyre.

“Potemkin do ta kishte përçmuar Putinin dhe gjithçka që ai përfaqëson”, tha ai.

Potemkin dhe Perandoresha Katerina e konsideronin atë zonë si një dritare kozmopolite drejt Mesdheut, të populluar nga një përzierje e gjallë e njerëzve të etnive dhe prejardhjeve të ndryshme kombëtare.

Marrë nga “New York Times”, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.