Policia e Kosovës: Festa e Vitit të Ri kaloi pa incidente madhore

Policia e Kosovës, përmes një komunikate për media ka bërë të ditur se nata e Vitit të Ri 2022, ka kaluar e qetë dhe pa incidente madhore.

“Referuar raportimeve nga të gjitha Drejtoritë Rajonale Policore (DRP), nata e vitit të ri ka kaluar kryesisht e qetë, megjithëse janë raportuar disa raste ku janë përdorur armë zjarri ‘për të festuar’ dhe incidente me lëndime të lehta nga përdorimi i pakujdesshëm i mjeteve piroteknike”, thuhet në komunikatë.

Me rastin e festës, PK-ja ka thënë se ka hartuar urdhrin operative, i cili parashihte zbatimin e disa pikave.

Policia e Kosovës me rastin e festës së vitit të ri, ka hartuar dhe zbatuar urdhrin operativ, ku në pika të përgjithshme parashihej shtimi i masave të sigurisë, shtimi i prezencës policore në ambiente ku parashihet të ketë prezencë më të madhe të qytetarëve, kontrolli në trafik, kontrolli në pikat kufitare përfshirë aeroportin.

Ndërsa, në aspektin e sigurisë të premten e 31 dhjetorit, nuk është raportuar për asnjë aksident trafiku me fatalitet.

“Policia e Kosovës të gjithë qytetarëve të vendit ua uron vitin e ri 2022, të jetë edhe ky vit, vit i bashkëpunimit të qytetarëve më policinë, në të mirë të ruajtjes së rendit dhe qetësisë publike, jetës dhe pronës”, thuhet në komunikatën e Policisë së Kosovës.

Ndryshe, shtatë persona janë lënduar nga mjetet piroteknike dhe një person tjetër nga plumbi qorr në natën e ndërrimit të moteve në Kosovë.

Kështu ka bërë të ditur mjeku kujdestar, Agron Çitaku, në Klinikën Emergjente në Qendrën Klinike Universitare të Kosovës (QKUK).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.