Nëna e Alexei Navalny-t i ka drejtuar thirrje presidentit rus Vladimir Putin për kthimin e trupit të tij.
Në një video të filmuar jashtë burgut ku ai ndërroi jetë, ajo ka thënë se po përpiqej ta shihte për pesë ditë. Por as nuk e dinte se ku ishte.
“Kam pesë ditë që nuk mund ta shoh, po refuzojnë të ma japin trupin e tij dhe as që thonë se ku është”.
“Po ju pyes, Vladimir Putin – gjithçka varet vetëm nga ju. Më lejoni të shoh më në fund djalin tim. Unë kërkoj që trupi i tij të lirohet menjëherë në mënyrë që t’i bëj një varrim të denjë”.
Edhe gruaja, Yulia, u ka kërkuar autoriteteve të mos i ndalonin të dashurit e tij që t’i thonë lamtumirë.
Yulia Navalnaya kërkon kthimin e trupit të Navalnyt, për ta varrosur me dinjitet
Sakaq, familjes i është thënë se trupi i tij nuk do të kthehet për dy javë.
Nëna e tij u informua se po mbahej për kryerjen e “analizave kimike”.
Ndërkohë nuk ka asnjë konfirmim për vendndodhjen e trupit nga autoritetet ruse, teksa përpjekjet për gjetjen e tij janë mbyllur vazhdimisht.
Yulia ka pretenduar se trupi i burrit të saj po mbahej derisa gjurmët e helmimit nga agjenti nervor Novichok të ishin zhdukur.
Navalny i mbijetoi një përpjekjeje për ta vrarë në vitin 2020.
Por zëdhënësi i Kremlinit, Dmitry Peskov, i ka quajtur akuzat “të pabaza dhe vulgare”.
Agjencia ruse e lajmeve Tass ka raportuar sakaq se një çështje e re penale ka nisur kundër vëllait të Navalny-t, Oleg.
Ai tashmë është në kërkim nga policia.
Vdekja e Navalny-t në burg u njoftua të premten.
Autoritetet në koloninë penale siberiane ku ai po mbahej thanë se ai kurrë nuk kishte rifituar vetëdijen pasi u rrëzua pas një shëtitjeje.
Zyrtarët thanë më vonë se Navalny kishte pësuar “sindromën e vdekjes së papritur”.
Nëna dhe avokati i tij udhëtuan për në koloninë e largët sapo u dha lajmi për vdekjen e tij.
Por përpjekjet për gjetjen e trupit janë mbyllur vazhdimisht.
Të hënën, Kremlini tha se një hetim për vdekjen e tij ishte në vazhdim dhe se ende nuk kishte “asnjë rezultat”.
Navalny, i cili ishte lideri më i rëndësishëm i opozitës ruse për dekadën e fundit, kishte vuajtur një dënim 19-vjeçar për akuza që shumë i konsideronin si të motivuara politikisht.
Udhëheqësit perëndimorë ia kanë vënë fajin presidentit Putin për vdekjen e Navalny. Si BE ashtu edhe SHBA kanë thënë se po shqyrtojnë sanksione të reja ndaj Rusisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Urdhër-arrestet e Hagës, Hamasi: “Viktimat dhe xhelatët janë barazuar”
-
Kosova s’duhet të shndërrohet “strehë për kriminelët”, marrëveshja me Danimarkën sjellë “standarde të dyfishta”
-
Mexhiti: Puna e kryeparlamentarit e kryer, do t’i takojë “VLEN”-it
-
Aksioni në Veri, Daçiç: Kjo qasje do të sjellë konflikte të reja në Ballkan
Lajmet kryesore
-
“Prodhimi i armëve”, Çfarë parashikon projektligji i hedhur në konsultim
-
Kuvendi skualifikon 6 kandidatë për KLGJ dhe KLP
-
Versioni iranian se vdekja e Raisi-t erdhi nga një defekt teknik nuk i bind ekspertët
-
SHBA-ja akuzon Kosovën për “përshkallëzim të tensioneve” pas mbylljes së degëve të bankës serbe në veri