Në mbledhjen e përbashkët të Qeverive të Kosovës dhe Shqipërisë që do të mbahet të premten e 26 nëntorit, do të nënshkruhen rreth 15 marrëveshje.
Fokusi i kabineteve qeveritare do të jetë në fushën e lëvizjes së lirë, arsimit, drejtësisë, infrastrukturës, kulturës dhe lehtësimit të bashkëpunimit dhe shkëmbimit tregtar.
Kështu ka thënë për Albanian Post, zëdhënësi i Qeverisë së Kosovës, Përparim Kryeziu, i cili theksoi se përveç marrëveshjeve, do të nënshkruhen edhe disa memorandume bashkëpunimi dhe protokolle.
“Do të nënshkruhen rreth 15 marrëveshje. Ato përfshijnë fushën e lëvizjes së lirë, lehtësimit të bashkëpunimit dhe shkëmbimit tregtar, në fushën e arsimit, drejtësisë, infrastrukturës dhe kulturës”, është shprehur ai.
Po ashtu, sipas Kryeziut, gjatë mbledhjes të së premtes, do të formohet edhe sekretariati koordinues ndërqeveritar.
Nga ky vendim, Kryeziu ka theksuar se zbatimi i marrëveshjeve do të bëhet edhe më i plotë,
Ndërkohë, shtoi se është duke e bërë një analizë e mirëfilltë të marrëveshjeve të kaluara me qëllim të vlerësimit të zbatimit të tyre.
Ndërkohë, deri më tani, Kosova dhe Shqipëria kanë mbajtur gjashtë mbledhje të përbashkëta.
Nga këto mbledhje, janë nënshkruar rreth 130 marrëveshje, memorandume dhe protokolle bashkëpunimi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
