SHBA-të kanë thënë se po rishikon bashkëpunimin e saj dypalësh me Gjeorgjinë lidhur me ligjin e saj të diskutueshëm të “agjentëve të huaj” që shkaktoi protesta masive javësh në kryeqytetin Tbilisi.
Në një deklaratë, Sekretari Amerikan i Shtetit Antony Blinken tha se Washingtoni po vendos kufizime të vizave për individët përgjegjës për “minimin e demokracisë në Gjeorgji”.
Asnjë zyrtar nuk u emërua, por ata besohet të jenë anëtarë të partisë qeverisëse Ëndrra Gjeorgjiane.
Kritikët thonë se ligji për “agjentët e huaj” është frymëzuar nga legjislacioni i ngjashëm i përdorur në Rusinë fqinje për të synuar kritikët e Kremlinit – një pretendim i mohuar nga partia në pushtet.
Zyrtarët në Tbilisi argumentojnë se legjislacioni do të “rrisë transparencën” e financimit të huaj.
I miratuar javën e kaluar, ligji kërkon që organizatat joqeveritare dhe mediat e pavarura që marrin më shumë se 20% të financimit të tyre nga donatorë të huaj, të regjistrohen si organizata “që mbartin interesat e një fuqie të huaj”.
Presidenti i Gjeorgjisë ka vënë veton ndaj ligjit – por partia në pushtet ka mjaft deputetë për të anashkaluar ndërhyrjen e saj duke mbajtur një tjetër votim në parlament.
Në deklaratën e së enjtes, Blinken tha se partia Ëndrra Gjeorgjiane “ka zhvilluar dhe miratuar një ligj për ‘ndikim të huaj’ që do të mbyste ushtrimin e lirive të asociimit dhe shprehjes, do të stigmatizonte organizatat që u shërbejnë qytetarëve të Gjeorgjisë dhe do të pengonte organizatat e pavarura të medias që punojnë për të t’u sigurojë gjeorgjianëve akses në informacione me cilësi të lartë.
“Ndërsa qytetarët gjeorgjianë kanë shprehur kundërshtimin e ligjit, ne kemi parë indikacione të qarta të një fushate frikësimi dhe përdorimit të dhunës për të shtypur disidencën paqësore”.
Blinken shtoi se masat “bien ndesh me qëllimin e deklaruar prej kohësh të Gjeorgjisë – të pasqyruar në kushtetutën e saj – për integrimin euro-atlantik dhe partneritetin strategjik me Shtetet e Bashkuara”.
Kryediplomati amerikan tha gjithashtu se shpreson që “udhëheqësit e Gjeorgjisë do ta rishqyrtojnë projektligjin”.
Autoritetet në Tbilisi ende nuk kanë komentuar publikisht mbi masën e SHBA.
Por më herët të enjten, zëdhënësja e ministrisë së jashtme ruse Maria Zakharova akuzoi Uashingtonin për shantazh ndaj Gjeorgjisë.
Gjeorgjisë iu dha statusi i kandidatit për në BE në dhjetor 2023 dhe BE-ja tashmë ka paralajmëruar se ligji i ri do të dëmtonte ambiciet e Tbilisit për t’u bashkuar me bllokun 27-anëtarësh.
Tubimet masive kundër projektligjit të “agjentit të huaj” kanë mbërthyer vendin e Kaukazit për javë të tëra, duke u kthyer shpesh në grindje të dhunshme midis protestuesve dhe policisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
