Importet e energjisë elektrike në Shqipëri janë rritur në tremujorin e parë të vitit, sipas një publikimi të fundit nga Instituti i Statistikave INSTAT, ku shifrat reflektojnë shtim të importeve me të paktën 2.2 herë.
Sipas bilancit të bërë publik, viti 2024 nuk ka arritur të tejkalojë vitin 2023 në aspektin e prodhimit, sa i takon tre muajve të parë, pavarësisht se shifrat referojnë të dhëna të kënaqshme. Por, 2023-shi ka qenë një vit hidrik më i mirë për vendin.
Kjo gjë ka bërë që të mos bjerë vetëm prodhimi, por edhe eksportet e energjisë në vend, në një kohë kur importet janë rritur për të plotësuar nevojat e konsumatorëve.
Importi bruto i energjisë elektrike (energji në marrje), në tremujorin e parë të vitit 2024, arriti vlerën 535 GWh, nga 246 GWh që ishte në të njëjtën periudhë të një viti më parë, duke shënuar kështu një rritje me 2,2 herë. Eksporti bruto i energjisë elektrike (energji në dhënie) arriti vlerën 814 GWh nga 904 GWh, duke shënuar një rënie me 10,0%, sipas vlerësimit të INSTAT.
Në terma të prodhimit ndërkohë, peshën kryesore në vend e kanë mbajtur prodhuesit privatë.
Sipas INSTAT hidrocentralet publike, në tremujorin e parë të vitit 2024, prodhuan 1.162 GWh nga 1.614 GWh të prodhuar në tremujorin e parë të vitit 2023, duke pësuar kështu një rënie të prodhimit me 28,1%.
Hidrocentralet private dhe koncensionare nga ana tjetër, prodhuan 1.246 GWh nga 1.156 GWh të prodhuar në të njëjtën periudhë të një viti më parë, duke shënuar një rritje të prodhimit të energjisë elektrike me 7,8%. Shkëmbimi i energjisë elektrike (diferenca mes eksportit dhe importit bruto të energjisë), në tremujorin e parë të vitit 2024 është 279 GWh nga 658 GWh që ishte në tremujorin e parë të vitit 2023.
Sa i takon përdorimit të energjisë, edhe ajo është rritur në tremujorin e parë, ku përmendet shifra 7.6% nga INSTAT, duke arritur vlerën 1.716 GWh nga 1.595 GWh që ishte në tremujorin e parë të vitit 2023.
“Ndikimin më të madh në rritjen e përdorimit të energjisë elektrike nga konsumatorët e kanë dhënë konsumatorët familjarë, ku kemi një rritje të konsumit të energjisë elektrike me 9,5%, përkundrejt rritjes me 5,1% të energjisë së konsumuar nga konsumatorët jo familjarë”, përmbyllet publikimi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
