Grenell: Administrata e Biden e humbi rastin historik për marrëveshje mes Kosovës dhe Serbisë

Gjithë momentumin e krijuar nga administrata e Donald Trump për një marrëveshje finale në mes të Kosovës e Serbisë nuk e ka shfrytëzuar dhe e ka hedhur poshtë presidenti i tanishëm amerikan, Joe Biden, ka thënë Richard Grenell, ish-këshilltar i lartë i Trump dhe i dërguar special i tij për Ballkanin.

“Në shtator të 2020-tës, presidenti (Donald) Trump bëri bashkë krerët e shteteve nga Kosova dhe Serbia në zyrën ovale. Ai ishte në gjendje të vinte këto dy palë në të njëjtën dhomë, për të nënshkruar një marrëveshje historike për normalizimin ekonomik”, thotë Grenell në një video të publikuar nga organizata konservative “Qendra Amerikane për Ligj dhe Drejtësi”, në kanalin e tyre në Youtube.

“Fatkeqësisht në vitin e fundit kemi parë administratën e Biden duke e humbur krejtësisht mundësinë që ua la në dorë presidenti Trump”.

“Ne patëm punuar shumë për t’i bërë të dy palët bashkë, që të ndalin fushatën e njohjes dhe të çnjohjes”, vazhdon Grenell duke sqaruar situatën që mbretëronte kur Kosova lobonte për anëtarësim në organizata ndërkombëtare dhe njohje të reja, ndërsa Serbia bënte të kundërtën në dëm të Kosovës.

Ajo të cilën presidenti Trump po përpiqej ta arrinte, thotë Grenell, “ishte që të bënte bashkë këto dy palë dhe për një vit të ndalonin fushatën e njohjeve dhe çnjohjeve”.

Dhe kjo marrëveshje u arrit, “ata u pajtuan që për një vit do të vazhdonin të flisnin”, por pa i bërë dëm njëra tjetrës.

Por kjo marrëveshje ishte nënshkruar që të zbatohej vetëm një vit, kështu në shtator të vitit 2021, marrëveshja përfundoi.

“Administrata e presidentit Biden”, thekson Grenell, “nuk u përpoq as pak për të zgjatur atë moment të pabesueshëm të marrëveshjes, ku të dyja palët do të ndaleshin dhe do të binin dakord të fillonin marrëveshjet ekonomikisht dhe të ecnin përpara”.

Nuk është bërë as një përpjekje presidenciale nga Shtëpia e Bardhë për të provuar që të bëjnë bashkë “Kosovën dhe Serbinë për të ndërtuar mbi këtë marrëveshje të jashtëzakonshme”, ka përfunduar Grenell.

“Marrëveshja e Washingtonit”

Më katër shtator të vitit 2020, Kryeministri i Kosovës, Avdullah Hoti dhe Presidenti i Serbisë, Aleksandar Vuçiç, kanë nënshkruar marrëveshje për normalizim ekonomik në Shtëpinë e Bardhë, në prani të presidentit të Shteteve të Bashkuara, Donald Trump.

Më poshtë janë pikat e pë​rmbajtjes së​ marrë​veshjes së​ në​nshkruar nga pala kosovare.​

Të dyja palët do të zbatojnë marrëveshjen për autostradën Beograd-Prishtinë, të nënshkruar më 14 shkurt, 2020.

Të dyja palët do të zbatojnë marrëveshjen e hekurudhave Beograd-Prishtinë të nënshkruar më 14 shkurt, 2020. Për më tepër, të dyja palët do t’i përkushtohen një studimi të fizibilitetit për mundësitë e lidhjes së infrastrukturës hekurudhore Beograd-Prishtinë me një port në det të thellë në Adriatik.

Kosova (Prishtina) dhe Serbia (Beogradi) do të punojnë me Korporatën Ndërkombëtare të SHBA-së për Zhvillim Financiar dhe EXIM, në memorandumet e mirëkuptimit, për të operacionalizuar këto:

-Autostradën e paqes

-Lidhjen hekurudhore Prishtinë-Merdare

-Lidhjen hekurdhore Nish-Prishtinë

-Sigurimin e financave për mbështetjen e kredive që kërkohen për ndërmarrjet e vogla dhe të mesme

-Projekte shtesë dypalëshe

-Prani e plotë ndërkombëtare në Beograd, Serbi, e Korporatës Ndërkombëtare të SHBA-së për Zhvillim Financiar.

Të dyja palët do të hapin dhe operacionalizojnë objektin në pikëkalimin e përbashkët kufitar Merdare.

Të dyja palët do t’i bashkohen “zonës së mini-Schengenit”, të shpallur nga Serbia, Shqipëria dhe Maqedonia e Veriut në tetor të vtit 2019 dhe do t’i shfrytëzojnë plotësisht përfitimet nga ajo.

Të dyja palët do t’i njohin diplomat dhe certifikatat profesionale të njëra-tjetrës.

Të dyja palët do të pajtohen të punojnë me Departamentin amerikan të Energjisë dhe subjektet e tjera të Qeverisë amerikane në një studim fizibiliteti, me qëllim të pëërdorimit të përbashkët të Liqenit të Ujmanit, si furnizues i sigurt i ujit dhe energjisë.

Të dyja palët do të shumëfishojnë burimet e tyre të energjisë.

Të dyja palët do të ndalojnë përdorimin e pajisjeve 5G, të siguruara nga shitës të pabesueshëm, në rrjetet e tyre të komunikimit. Aty ku tashmë ka pajisje të tilla, të dyja palët angazhohen për heqjen e tyre dhe përpjekje tjera të ndërmjetësimit në kohën e duhur.

Të dyja palët do të rrisin kontrollin e pasagjerëve ajrorë, ndarjen e informacioneve midis njëra-tjetrës dhe brenda kornizës së përgjithshme të bashkëpunimit me SHBA-në në Ballkan, dhe do të angazhohen për përditësime teknologjike, për të luftuar aktivitetet keqdashëse, duke zbatuar dhe operacionalizuar sistemet e siguruara nga SHBA-ja, për kontroll dhe informacion, përfshirë: PISCES, APIS, ATS-G dhe SRTP.

Të dyja palët zotohen se do të mbrojnë dhe promovojnë liritë fetare, duke përfshirë edhe rifillimin e komunikimit ndërfetar, mbrojtjen e vendeve fetare dhe zbatimin e vendimeve gjyqësore, që janë të lidhura me Kishën Ortodokse Serbe, si dhe vazhdimin e kthimit të pronave pa trashëgimi nga periudha e Holokaustit, si dhe të pronave hebreje që nuk i ka kërkuar askush.

Të dyja palët zotohen të përshpejtojnë përpjekjet që të lokalizojnë dhe identifikojnë mbetjet e personave të humbur. Të dyja palët angazhohen që të identifikojnë dhe implementojnë zgjidhje të gjata dhe të qëndrueshme për refugjatët dhe personat e zhvendosur brenda vendit. Të dyja palët angazhohen që të përcaktojnë një pikë kontakti, që do t’i udhëheqë këto përpjekje brenda ministrive të tyre respektive dhe do t’i koordinojë këto përpjekje mes Beogradit dhe Prishtinës, si dhe do t’i përditësojë të dhënat për numrin e rasteve të zgjidhura dhe ato që janë në proces, çdo vit.

Të dyja palët do të punojnë me 69 vendet, të cilat homoseksualietin e konsiderojnë si krim, që ta dekriminalizojnë.

Të dyja palët zotohen ta shpallin Hezbollahun organizatë terroriste dhe t’i përmbushin në tërësi masat për të kufizuar operacionet e Hezbollahut dhe aktivitetet financiare nën juridiksionin e tyre.

Kosova (Prishtina) do të pajtohet që ta zbatojë një moratorium njëvjeçar, për të mos kërkuar anëtarësim të ri në organizata ndërkombëtare. Serbia (Beogradi) do të pajtohet ta zbatojë një moratorium njëvjeçar mbi fushatën e saj për çnjohje dhe do të përmbahet nga kërkesa zyrtare ose jozyrtare ndaj ndonjë vendi ose organizate ndërkombëtare, që të mos e njohë Kosovën (Prishtinën) si shtet të pavarur. Të gjitha marrëveshjet për të hequr dorë do të hyjnë në fuqi menjëherë.

Kosova (Prishtina) dhe Izraeli pajtohen të njohin njëri-tjetrin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.