Maqedonci: Operacioni “Interflex”, tregues i nivelit të bashkëpunimit me Mbretërinë e Bashkuar

Ministri i Mbrojtjes, Ejup Maqedonci, gjatë vizitës së tij zyrtare në Mbretëri të Bashkuar ka vizituar kontingjentin e Forcës së Sigurisë së Kosovës (FSK), të cilët po kryejnë operacionin “Interflex”.

Maqedonci, përmes një shkrimi në rrjetin social ‘Facebook’ ka thënë se bashkë me FSK-në po kryejnë stërvitje edhe shumë shtete të tjera.

“Në kuadër të këtij operacioni, shumë shtete partnere të Mbretërisë së Bashkuar angazhojnë kapacitetet e tyre trajnuese që së bashku me Ushtrinë Britanike të stërvisin taktikisht ushtarakët ukrainas për mbrojtjen e vendit të tyre nga agresioni rus”.

Sipas tij, bashkëpunimi në këtë operacion tregon për marrëdhëniet që gëzon Kosova me Mbretërinë e Bashkuar.

“Angazhimi i instruktorëve të FSK në këtë operacion, është tregues i nivelit të shkëlqyeshëm të bashkëpunimit me Mbretërinë e Bashkuar në fushën e mbrojtjes dhe sigurisë si dhe përmbushje e objektivave të Republikës së Kosovës për mbështetje të vazhdueshme të Ukrainës në luftën ndaj agresionit rus”.

Më 12 janar, ministri i Mbrojtjes, Ejup Maqedonci, kishte bërë të ditur se gjatë muajit janar kontingjenti i Forcës së Sigurisë së Kosovës (FSK), do të zbarkojë në Mbretërinë e Bashkuar për operacionin INTERFLEX.

“Operacioni Interflex zhvillohet në Mbretërinë e Bashkuar, dhe ka për qëllim trajnimin e trupave të Ushtrisë së Ukrainës”.

Ministria e Mbrojtjes dhe Forca e Sigurisë së Kosovës kishte ofruar gatishmëri që të angazhojë instruktorë për të ndihmuar procesin e stërvitjes së ushtrisë ukrainase në kuadër të këtij operacioni.

Më 19 janar edhe presidentja e Kosovës, Vjosa Osmani, i kishte uruar suksese kontingjentit të ushtarëve të Forcës së Sigurisë së Kosovës (FSK), të cilët ishin nisur për në Mbretërinë e Bashkuar për operacionin “INTERFLEX”.

Ky operacion realizohet në mbështetje dhe përgatitje të personelit ushtarak të Ukrainës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.