Për herë të parë në Parlamentin Evropian është votuar rezoluta që kërkon njohje reciproke mes Kosovës dhe Serbisë.
Në dokument thuhet se për herë të parë njohja reciproke e Serbisë dhe Kosovës është zgjidhja e dialogut ndërmjet Beogradit dhe Prishtinës.
Një pjesë e fjalisë në rezolutën që i bën thirrje Serbisë dhe Kosovës të arrijnë një marrëveshje për normalizimin e marrëdhënieve “bazuar në njohjen reciproke” është shtuar përmes një amendamenti të paraqitur nga Lukas Mandl, anëtar i Partisë Popullore Evropiane.
Eurodeputeti katalonez, Jordi Sole, në seancën plenare të Parlamentit Evropian është shprehur se i mbështesin reformat e Kosovës që do ta sjellin atë më afër BE-së.
Ndërsa ka përmendur edhe vendet të cilët po e refuzojnë Kosovën.
“Ne i mirëpresim reformat e Kosovës që do ta sjellin vendin më afër Bashkimit Evropian. Pesë shtete anëtare të BE-së – përfshirë Spanjën – me kryefortësi po refuzojnë të njohin Kosovën si shtet të pavarur, një shtet i cili së shpejti do të na kërkojë formalisht që të bëhet shtet anëtare e Bashkimit Evropian”, ka shkruar Sole.
Ai madje refuzimin nga ana e Spanjës e ka quajtur si “situatë absude”.
Kosovës i janë bërë premtime dhe ato premtime nuk janë nderuar, ka thënë edhe eurodeputeti austriak, Lukas Mandl në Parlamentin e BE-së, derisa elaboroi padrejtësinë që u është bërë qytetarëve të Kosovës, të cilët ende nuk gëzojnë lirinë e lëvizjes së lirë brenda Bashkimit Evropian.
Mandl e cilësoi si demokraci të qëndrueshme sistemin socio-politik në Kosovë, për çka tha se është shtet me shumë diversitet.
“Dua të them se Kosova ka paguar me gjak lirinë e saj. BE dhe ShBA e ndihmuan vendin për të fituar pavarësinë. Ky vend është bërë demokratik, ka sundim të ligjit dhe e ka bërë me shpejtësi të madhe. Është demokraci e qëndrueshme dhe vend me shumëllojshmëri”, u shpreh Mandl.
Kosova, tha Mandl, është demokracia më e re në Evropë. Ndryshe, rezoluta të tilla të Parlamentit Evropian, që në formën e raporteve individuale për vendet e rajonit të Ballkanit Perëndimor miratohen një herë në vit, kanë një rëndësi politike, por ato nuk janë obliguese për vendet anëtare të BE-së.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com