Këtë të entje është ndarë nga jeta, regjisorja e mirënjohur Vjosa Berisha.
Berisha, e cila vuante nga kanceri në vezore, ka ndërruar jetë në spitalin “University College Hospital” në Londër.
Lajmin e ka bërë të ditur bashkëshorti i saj, Fatos Berisha, përmes një postimi në Instagram.
“Me pikëllim të thellë bëjmë të ditur se e dashura jonë Vjosa Berisha ndërroi jetë, sot me datë 23 qershor në spitalin University College Hospital në Londër”, ka shkruar ai.
Ndërkaq, data dhe vendi i varrimit, sipas njoftimit, do të bëhet e ditur më vonë.
Berisha ishte diagnostikuar me kancer në vezore që nga marsi i vitit 2013.
Ajo po merrte mjekim jashtë vendit, megjithatë viteve të fundit u tha se gjendja e saj ishte stabile.
Berisha ishte anëtare e Akademisë Evropiane të Filmit që nga viti 2013, dhe formimi i saj arsimor përbëhet nga një diplomë Master i Arteve në Media dhe Komunikim nga Universiteti i Westminster, Londër në Mbretërinë e Bashkuar dhe një diplomë pasuniversitare në Diplomaci Bashkëkohore nga Universiteti i Maltës, në Maltë.
Gjithsesi, ajo numëronte mbi 20 vjet përvojë në marrëdhëniet me publikun, median dhe industrinë e filmit.
Regjisorja ka qenë bashkëpronare dhe shefe ekzekutive e kompanisë së prodhimit të filmit dhe televizionit “B2 – PR & Media Solutions”, me zyra në Kosovë dhe Shqipëri.
Gjithashtu ishte bashkëthemeluese e Festivalit Ndërkombëtar të Filmit në Prishtinë “Pri Film Fest”, i themeluar në vitin 2008, i cili për 11 vjet u bë një nga ngjarjet më të rëndësishme të industrisë së filmit në vend.
Përveç kësaj, Berisha në vitin 2019 kishte prodhuar filmin e saj të parë artistik si producente – “The Flying Circus” me skenaristin, regjisorin dhe burrin e saj Fatos Berisha.
Në po atë vit kishte bashkë-prodhuar filmin artistik maqedonas “The Happiness Effect” me regjisorin Borjan Zafirovski.
Figurat politike, publike, kolegët e Vjosës, janë shprehur të tronditur me vdekjen e papritur të saj, ndërsa nuk kanë ngurruar që ngushëllimet t’i ndajnë me publikun në mediat sociale.
Këngëtari, Dren Abazi ka qenë ndër të parët që ka reaguar duke thënë: “Fatos, me pikelloi shume ky lajm! Bonu i forte. Ngushëllime të sinqerta”
Reagim ka bërë edhe moderatorja Xheraldina Vula, e cila përmes një postimi në Instagram, i dha lamtumirën e fundit Vjosës.
“Lamtumire Vjoski, lamtumire dashnia jone ne karantine”.
Ministria e Kulturës, Rinisë dhe Sportit përmes një statusi në rrjetin social “Facebook”, ku mes tjerash thuhej se “nuk e humbëm vetëm një artiste, por humbëm një person me vlera të çmuara që kontribuoi pareshtur për kulturën e re të vendit tonë”.
“Me pikëllim të thellë morëm lajmin e hidhur për ndarjen nga jeta të regjisores dhe producentes, Vjosa Berisha. Ikja e parakohshme ka ndalur përgjysmë veprimtarinë e saj artistike, menaxheriale dhe kjo lë zbrazëti shumë të madhe në artin dhe kulturën e vendit tonë” ka shkruar MKRS.
Një reagim për vdekjen e regjisores e ka bërë edhe ambasadori i Britanisë së Madhe në Kosovë, Nicholas Abbott, i cili ndihet i pikëlluar.
“U mërzita shumë kur dëgjova sot për vdekjen e Vjosa Berishës. Ajo ishte kryetarja e Chevening Kosovo dhe ishte gjithmonë kënaqësi ta takoja, të flisnim për punën e saj dhe çfarë mund të bënim më shumë për të promovuar Britanisë së Madhe”, ka shkruar ai.
I was very sad to hear today about the death of Vjosa Berisha. She was the Head of the @CheveningKosovo and it was always a pleasure to meet her, to talk about her work and what more we could do to promote the UK. We will miss her and our condolences go to her family and friends. pic.twitter.com/vtmzy1oAe6
— Nicholas Abbott (@nickabbottfcdo) June 23, 2022
Reagim pati edhe nga kryetari i Prishtinës, Përparim Rama, ka shprehur ngushëllime për vdekjen e regjisores të cilën e ka quajtur “Vjosa e Prishtinës”
“Sot, Prishtinës iu shua një dritë që përgjatë njëzet viteve pa u ndalur, ka rrezatuar aq shndritshëm në skenën kulturore e kinematografike në vend me punën, profesionalizmin dhe energjinë e saj të pashoq”, ka thënë mes tjerash Rama, në Facebook.
Kryetari i Bashkisë së Tiranës, Erion Veliaj, përmes një fotografie përkrah Vjosës, ka shprehur ngushëllimet e tij.
“Linde si dielli dhe mbete lart në qiell për të mos perënduar asnjëherë. Do na mungosh shumë! Lamtumirë Vjosa jonë e dashur””, ka thënë ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
