Regjisori palestinez Elia Suleiman do të nderohet nga Festivali i Filmit në Sarajevë

Festivali i 30-të i Filmit në Sarajevë do t’i bëjë homazhe regjisorit palestinez Elia Suleiman në njohje të “kontributit të tij të jashtëzakonshëm në artin e filmit”.

Regjisorit do t’i jepet çmimi “Zemra e nderit e Sarajevës” dhe do të nderohet me një retrospektivë të veprave të tij të përzgjedhura në programin “Tribute to” të festivalit.

Suleiman ishte mysafir në Sarajevë në vitin 2019, ku filmi i tij “It Must Be Heaven” u shfaq në programin Open Air, shkruan Variety, transmeton AlbanianPost.

Filmi kishte marrë vlerësimin special të jurisë në Kanë të njëjtin vit. Ai gjithashtu shërbeu si president i jurisë në Sarajevë në vitin 2016 dhe ishte i ftuar në festival në vitin 2013.

Jovan Marjanoviç, drejtori i festivalit, tha se “gjuha universale e kinemasë së Sulejmanit flet për vlerat dhe emocionet themelore njerëzore: frikën dhe shpresën, shtëpinë dhe atdheun”.

“Me zgjuarsinë, humorin dhe mprehtësinë e tij karakteristike, ai lundron në kompleksitetin e ekzistencës sonë, duke hedhur dritë mbi absurditetet e jetës me qartësi dhe mprehtësi të pashoq, duke portretizuar shpirtin dhe identitetin e Palestinës me një stil unik autorial. Tani, në kohërat më të errëta në vendin e tij të lindjes, vepra e tij shërben si një fener mirëkuptimi, duke na kujtuar fuqinë e tregimit për të frymëzuar dialogun kuptimplotë”, shtoi Marjanoviç.

I lindur në vitin 1960 në Nazaret, Suleiman jetoi në Nju Jork nga viti 1981 deri në vitin 1993. Ndërsa ishte në SHBA, ai drejtoi dy filmat e tij të parë të shkurtër, “Introduction to the End of an Argument” dhe “Homage by Assassination”, duke fituar çmime të shumta.

Në vitin 1994, ai u vendos në Jerusalem, ku Komisioni Evropian i kishte besuar misionin e krijimit të Departamentit të Filmit dhe Medias në Universitetin Birzeit.

Filmi i tij i parë me metrazh të gjatë, “Chronicle of a Disappearance” fitoi çmimin më të mirë të filmit të parë në Festivalin e Filmit të Venecias në vitin 1996.

Në vitin 2002, “Divine Intervention” fitoi çmimin e jurisë dhe Çmimin Ndërkombëtar të Kritikës Fipresci në Kanë si dhe çmimin e filmit më të mirë të huaj në “European Film Awards”.

Në vitin 2007, ai u zgjodh si një nga 35 regjisorët e “To Every His Own Cinema”, një film kolektiv për 60 vjetorin e Kanës.

Filmi i tij artistik “The Time That Remains” ishte në konkurrencë zyrtare në Kanë në vitin 2009.

Në vitin 2012, ai përfundoi filmin e shkurtër “Diary of a Beginner”, pjesë e një filmi kolektiv të titulluar “7 days in Havana”.

Filmi i tij i fundit artistik, “It Must Be Heaven”, fitoi përmendjen speciale të jurisë në Kanë në vitin 2019 dhe çmimin Fipresci.

Suleiman ka marrë pjesë në festivale të shumta si anëtar jurie, duke përfshirë Kanë dhe Venecia. Ai u emërua “Officier de l’Ordre des Arts et des Lettres” nga Ministria Franceze e Kulturës në vitin 2020. Suleiman ishte marrësi i çmimit të arritjes së Akademisë Evropiane të Filmit në kinemanë botërore në vitin 2022.

Suleiman aktualisht po shërben si këshilltar artistik për Institutin e Filmit në Doha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.