Abdixhiku: Po marrim mbështetje për programin kombëtar të LDK-së

Kryetari i Lidhjes Demokratike të Kosovës (LDK), Lumir Abdixhiku, ka thënë se janë duke marrë mbështetje nga qytetarët për programin e tyre kombëtar.

Këtë e ka thënë Abdixhiku pas një vizite që ka pasur me në qytetin e Gjilanit, ku ka zhvilluar aktivitete të shumta.

“E nisa vizitën fillimisht në nderime të dëshmorëve të kësaj ane. Së bashku me Lutfi Haziri e me familjarë vizituam varrezat e dëshmorëve; bëmë homazhe tek busti i Ibrahim Uruqit, në Bresalc – familjen e së cilit e vizituam menjëherë më pas! Djali i Hushit, sot ishte ushtar i Republikës! “, shkroi Abdixhiku në Facebook.

Lideri i opozitës bëri me dije se ka nderuar po ashtu dëshmorët: Hanumshahe e Tefik Zymberin, dhe se ka vizituar familjen e Nuri Idrizit; një veprimtar i madh i lëvizjes për liri e pavarësi, por edhe familjen Avdiu; e po ashtu dhe Bashkësinë Islame, “si shenjë e nderimit e respekti’.

Në fund, Abdixhiku njoftoi se ka mbajtur takim mobilizues me strukturën e partisë në Gjilan.

“Takimet me qytetarë e familje në çdo anë vazhdojnë të jenë bazament i ringritjes së djathtë. Po flasim hapur, po marrim mbështetje për programin tonë kombëtar, po rilidhim veten me secilin qytetar drejt një qëllimi të madh – bërjen e Republikës siç e meriton, siç mundet, siç do ta bëjmë bashkë!”

Në fund, i pari i LDK-së potencoi se “rrugën e bëjmë bashkë”, derisa i falënderoi gjilanasit për “pritjen e ngrohtë në çdo takim që patëm sot!”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.